«Meniń Qazaqstanym» elge shyqty

«Adamnyń basshysy – aqyl, sholýshysy – oı, jetekshisi – talap, qorǵaýshysy – sabyr, synaý­shysy – halyq, taýsylmaıtyny – arman, eń qymbattysy – ar saqtaý, bárinen ardaqtysy – ómir súrý, sonyń ishinde eń táttisi – syılastyq» degen eken Tóle bı babamyz. Osynyń ishindegi eń táttisi –dep otyrǵany – syılastyq, ol tek adamdar arasynda ǵana emes, sondaı-aq, el men el, ult pen ult arasyndaǵy syılastyq dep túsinetin bolsaq, onda sol syılastyqqa syzat túsirmeı kele jatqan Qazaqstan halqy Assambleıasy der edik. Osydan jıyrma jyl buryn Elbasy Nursultan Nazarbaevtyń qoldaýymen qurylǵan, ult pen ulysty baıyrǵy qazaq jerinde ózara yntymaq pen kelisimge uıytqan Assambleıa óte keń kólemdegi áleýmettik aksııasyn bastady. Qazaqstan halqy Assambleıasynyń 20 jyldyǵy, Uly Jeńistiń 70 jyldyǵy, Konstıtýsııanyń 20 jyldyǵyna baılanysty «Meniń Qazaqstanym» atty poıyz el aralaýdy Astanadan bastady. 23 naýryz kúni Astana vokzalynda «Meniń Qazaqstanym» poıyzyn shyǵaryp salý saltanaty boldy. Saltanatty sharada sóz sóılegen Qazaqstan halqy Asssambleıasy Tóraǵasynyń orynbasary, Hatshylyq meńgerýshisi E.Toǵjanov bul poıyzdyń maqsaty týraly bylaı dedi: «Poıyz quramynda mádenıet jáne medısına salasynyń, áleýmettik salanyń qyzmetkerlerimen birge, bank qyzmetkerleri de bar. Bul aksııanyń negizgi maqsaty – elge túrli konsýltasııalyq qyzmetter kórsetý».Odan keıin sóz alǵan Mádenıet jáne sport mınıstri A.Muhamedıuly «Meniń Qazaqstanym» poıyzyna aq jol tiledi. Uzaq jol alǵashqy qadamnan bastalady desek, Astanadan shyqqan «Meniń Qazaqstanym» poıyzy Soltústik Qazaqstan oblysynyń Taıynsha aýdanyna atbasyn tiredi. Aýdan jurtshylyǵy poıyz «jolaýshylaryn» úlken yqylaspen qarsy aldy. – Qazaqstan Respýblıkasy Prezıdentiniń 2015 jyldy Qazaqstan halqy Assambleıasy jyly dep jarııalaýy birlik pen kelisim jáne dostyq, «Máńgilik El» babalar armanynyń júzege asyrylýymen erekshelenip otyr, – dedi saltanatty sharada sóz sóılegen Taıynsha aýdanynyń ákimi S.Saltyqov.Odan keıin sóz alǵan «Meniń Qazaqstanym» poıyzynyń bastyǵy Ǵ.Telebaev, Májilis depýtaty Z.Saıapova poıyzdyń maqsaty týraly aıta kelip, onyń jumysyna tabystar tiledi. Qazaqstan halqy Assambleıasynyń 20 jyldyǵyna arnalǵan «Meniń Qazaqstanym» poıyzyndaǵy mamandar Taıynsha aýdanynyń 95 turǵynyna túrli sala boıynsha keńes berip, 450-den asa adamǵa medısınalyq kómek kórsetti. «Meniń Qazaqstanym» poıyzynyń bizdiń aýdandaǵy jumysy óte belsendi júrgizildi. Poıyzben kelgen túrli salanyń bilikti mamandary kúni boıy zańdyq jáne áleýmettik, bıznesti uıymdastyrý jáne júrgizý, memlekettik qyzmet kórsetý salalary boıynsha aýdan halqyna jan-jaqty túsindirý jumysyn júrgizdi», dedi aýdan ákimi S.Saltyqov. Osy poıyzdyń múshesi, Parlament Májilisiniń depýtaty Z.Saıapovanyń aıtýynsha, «QHA-nyń 20 izgi isi» aksııasy aıasynda Taıynsha qalasyndaǵy «Nadejda» ınternat úıinde ótken qaıyrymdylyq sharasy baǵytymyzdyń aıqyn, áleýmet úshin kómegi mol ekenin dáleldeı tústi. «Osy poıyzdyń eń basty maqsaty – elimizdiń barlyq óńirinde ulttyq birliktiń dánin egý. Bul «Máńgilik El» degen jalpyulttyq qundylyǵymyzdyń negizgi qurylymy deýge bolady. Jáne búgingi «Nadejda» ınternat úıinde ótken qaıyrymdylyq sharasy barysynda qarttarymyzdyń rızashylyǵy osy baǵytymyzdyń durystyǵyn dáleldedi», dedi Z.Saıapova. Aıtpaqshy, keshke Taıynshanyń qalyń jurtshylyǵy úlken konsert tamashalady. «Meniń Qazaqstanym» poıyzymen kelgen óner qaıratkerleri E.Ha­sanǵalıev, N.Núsipjanov, N.Es­qalıe­va, J.Seıdollauly, T.Zabırova, A.Jo­ra­baeva, D.Ahmadıeva jáne basqalar óz ónerlerin aýdan jurtshylyǵyna usyndy. * * * 25 naýryz kúni de Atbasar temirjol vokzalynyń basy dýmanǵa toly boldy. Aýdan jurtshylyǵy «Meniń Qazaqstanym» poıyzyn úlken saltanatpen qarsy aldy. Merekesi men berekesi tasyǵan osy toıda sóz sóılegen Aqmola oblystyq QHA hatshylyǵynyń meńgerýshisi M.Toqaeva: «Assambleıa jyly – elimizdegi ultaralyq tatýlyq pen beıbitshilik modeliniń saltanat qurǵan jyly. Táýelsizdik alǵaly beri bizdiń qol jetkizgen eń úlken qundylyǵymyz dál osy birlik pen tatýlyq bolyp qala bermek», dep tebirene sóıledi. Odan keıin sóz alǵan Atbasar aýdany máslıhatynyń hatshysy B.Boranbaev, delegasııa jetekshisi, «Meniń Qazaqstanym» poıyzynyń basshysy Ǵ.Telebaev jınalǵan kópshilikke kóńildegi sózderin aıtty. «Meniń Qazaqstanym» poıyzynyń Atbasardaǵy jumysy da úlken jetistiktermen aıaqtaldy. Bul jerde Qoǵamdyq kelisim keńesiniń qabyldaýy jumys istedi. Áleýmettik máselege, zań salasyna, kásipkerlik jáne aýyl sharýashylyǵy salasyna qatysty 200 atbasarlyq keńes alyp úlgirdi. Sondaı-aq, 240 adamǵa medısınalyq tekserý júrgizildi. «Elimizdegi ǵylymnyń damýy men bolashaǵynyń jaǵdaıy týraly» semınarǵa 86 adam qatyssa, jastardyń patrıottyq aksııasyna 500 adam qatysty. «Meniń Qazaqstanym» poıyzynyń qatysýshylary basqa da sharalar ótkizdi. Atbasar jurty keshke ónerpazdardyń ónerine tánti boldy. «Meniń Qazaqstanym» poıyzynyń endigi baǵyty – kıeli Arqalyq óńiri. Sharafaddın ÁMIROV, О́mir ESQALI, «Egemen Qazaqstan». Sýretti túsirgen Talǵat TÁNIBAEV.