Múgedek jandar memleket qamqorlyǵynda

 

Májilis depýtaty, «Nur Otan» partııasynyń múshesi Olga Kıkolenko basqaratyn «Jumyspen qamtý jáne halyq tabysy» baǵyty boıynsha sarapshylar tobynyń otyrysy ótti. Oǵan Májilis pen máslıhattardyń depýtattary, Densaýlyq saqtaý jáne áleýmettik damý, Ulttyq ekonomıka mınıstrlikteriniń, «Aýyl sharýashylyǵyn qarjylaı qoldaý qory» AQ-tyń, úkimettik emes uıymdardyń ókilderi qatysty.

Atalǵan sarapshylar tobynyń otyrysynda «Kedergisiz keleshek» par­tııa­lyq jobasy sheńberinde múmkindigi shek­teýli jandardy jumysqa ornalas­ty­rýdyń tıimdiligi, sonymen qatar, «Aýyl sharýashylyǵyn qarjylaı qoldaý qory» AQ júıesi boıynsha shaǵyn nesıelendirý máseleleri talqylandy. Jıynda belgili bolǵandaı, qazirgi tańda elimizde 626,7 myńnan astam múgedek jan bar. Olardyń ishinde 64,5 paıyzy eńbek etýge qabiletti jasta bolsa, densaýlyq jaǵdaıy boıynsha jumysqa jaramdylary 16 paıyzdy qurap otyrǵan kórinedi. Al 20 paıyzy (82,6 myń adam) jumysqa ornalasqan. Densaýlyq saqtaý jáne áleýmettik damý vıse-mınıstri Svetlana Jaqypovanyń sózine qaraǵanda, 2015 jyldyń I toqsanynyń qorytyndysy boıynsha, múmkindigi shekteýli 2,3 myńnan astam jandy jumyspen qamtý maqsatynda kóptegen sharalar júzege asyrylǵan. Onyń aıtýynsha, 967 azamat qoǵamdyq jumystarǵa baǵyttalǵan, 430 adam eńbek eter ornyn memlekettik qoldaý sharalarynyń kómeginsiz tapqan, al 322-si áleýmettik jumys oryndaryna jiberilgen. Condaı-aq, basqosý barysynda arnaıy jumys ornyn ashqandarǵa sýbsıdııa berý, múgedekterdi kásiporynnyń shtattyq sanyna baılanysty jumysqa ornalastyrý baǵytynda kvota berý tetigin jetildirý boıynsha normalar qarastyrylǵan keıbir zańnamalyq aktilerge engizilgen túzetýler Májiliste talqylanyp jatqany aıtyldy. Budan bólek, atalǵan normalardy iske asyrý úshin zańǵa qosymsha tıisti aktiler daıyndalý ústinde ekeni sóz boldy. О́z kezeginde depýtat Olga Kıko­lenko: «Qazirgi ekonomıkalyq sharttar men eńbek naryǵyndaǵy jaǵdaı sheń­berinde múgedekterdiń quqyqtaryn qorǵaý maqsatynda bekitilgen konven­sııanyń talaptaryn oryndaýymyz qajet. Bul talap – múgedekterdiń ju­mysqa ornalasýyna járdemdesý», dedi. Otyrysta halyqty jumyspen qam­týdyń tıimdi tetikteriniń biri – sha­ǵyn nesıelendirý ekenine basa nazar aýdaryldy. Búginde «Ju­mys­pen qamtý-2020» memlekettik baǵdar­la­masynyń aıasynda 28,7 myń jan nesıe alypty. Olardyń ishinde 20 myńy óz isin ashsa, 8,6 myńy bıznesteriniń kólemin keńeıtken. Osy arada atalǵan baǵdarlama sheńberinde 30 myńnan astam azamat kásipkerlik negizderi bo­ıynsha bilim alǵandaryn da aıta keteıik. Joldybaı BAZAR, «Egemen Qazaqstan».