Qyzylordada kásipkerler qaıyrymdylyq sharasyn ótkizdi

QYZYLORDA. 24 aqpan. Qyzylordada jaqynda ashylǵan pallıatıvtik kómek berý bólimshesin jabdyqtaýǵa aımaqtyń bıznes ókilderi belsendi atsalysýda. Bul týraly oblystyq kásipkerler palatasynyń baspasóz qyzmetine silteme jasaǵan egemen.kz tilshisi habarlady. Kásipkerler palatasy dırektorynyń mindetin atqarýshysy Darhan Myrzalıevtiń aıtýynsha, mesenattar jańa bólimge jumsaq, korpýsty, medısınalyq jıhazdar, turmystyq tehnıkalar, júris arbasyn jáne ózge de naýqastardyń qajettiligine arnalǵan zattardy alyp berdi. Olardyń basym bóligi munaı-servıstik kompanııalar, sondaı-aq  «Frac Jet», «NeftTehServıs», «PıEm Lýkas Qazaqstan», «Dos Injınırıng», «Syr Marjany», «Kyzylorda Wildlife Foundation» jaýapkershiligi shekteýli seriktestigi men Jandos Qarabala, Qadyrbergen Beder, Maqsat Múbarak, Anvar Iаkýpov. Kásipkerler bul kómekterin «emdelýshilerge moraldyq kómek kórsetip, qoldaý bildirgimiz keldi. Bul bastamamyz ózge azamattar da jalǵap alyp ketedi degen senimdemiz» deıdi. «Oblys ákiminiń qoldaýymen jergilikti bıýdjetten bólingen qarjyǵa oblysta onkologııalyq dertpen aýyratyn naýqastarǵa pallıatıvtik kómek kórsetýge arnalǵan 15 oryndyq hospıs ashylǵan bolatyn. Atalmysh aýrýǵa shaldyqqan, jaǵdaıy óte tómen azamattarǵa arnalǵan mundaı ortalyqty ashý burynnan josparymyzda bar bolatyn. Biraq sáti endi tústi. Kóńilge qýanysh uıalatatyny, kásipkerlerdiń birden kómek qolyn sozyp, ortalyqqa qajetti qural-jabdyqtarmen qamtamasyz etkendigi», – deıdi oblystyq densaýlyq saqtaý basqarmasynyń basshysy Aqmaral Álnazarova. Aıta keteıik, pallıatıvtik kómek berý bólimshesiniń emdelýshilerine palata janyndaǵy oblystyq isker áıelder keńesi de kómek kórsetýde. Keńes múshesi Aıjan Shegenova bastaǵan názik jandylar ortalyqty bólme gúlderimen bezendirip, qabyrǵa sýretterin tabys etti. Sondaı-aq, alda kele jatqan Halyqaralyq áıelder kúni qarsańynda sulýlyq salony qyzmetkerlerimen ortalyqta jatqan qyz-kelinshekterge qyzmet kórsetetindikterin jetkizdi. Erjan Baıtiles. Derek, sýret: Qyzylorda oblysy kásipkerler palatasynyń baspasóz qyzmeti.