Aqtóbe qalasyndaǵy №6655 áskerı bólimde Otan aldyndaǵy boryshyn ótep júrip, el tynyshtyǵyn buzǵysy kelgen sodyrlardyń qolynan qaza tapqan jaýynger Sapar Dosboldyń denesi ózi týyp-ósken Shardara aýdanyndaǵy Kóksý aýylynda jerlendi.
Nıeti buzyq jaý qolynan mert bolǵan jaýyngerdi aqtyq saparǵa shyǵarý rásimine aýyldastary, jaqyn aǵaıynynan bólek, oblys ákimi Beıbit Atamqulov pen Ulttyq ulan bas qolbasshysynyń orynbasary Muhametqalı Satov, OQO Qorǵanys isteri jónindegi departamentiniń qyzmetkerleri men Shymkent áskerı komıssarıatynyń áskerı qyzmetkerleri qatysty.
– Jastyǵyna qaramaı, jaýynger Sapar Dosbol áskerı boryshyn óteý kezinde qaısarlyǵy men otansúıgishtik qasıetin tanyta bildi. Dosboldyń ólimi – otbasynyń basyna ǵana túsken aýyr qaza emes, búkil ońtústik jurtynyń jáne kúlli Qazaqstan halqynyń júregine túsip otyrǵan úlken qaıǵy. Ol óziniń artyna óshpes iz qaldyrdy. Onyń jarqyn beınesi bizdiń jadymyzda árdaıym saqtalady, – dedi oblys ákimi.
Oblystyq ákimdik qaraly otbasyna járdem retinde 5 mln. teńge kóleminde járdem kórsetti. Sonymen qatar, Sapar Dosboldyń esimin máńgi este qaldyrý úshin aýyldyń bir kóshesine atyn berý máselesin sheshý úshin Mádenıet jáne sport mınıstrligine hat joldady
Baqtııar TAIJAN,
«Egemen Qazaqstan»
Ońtústik Qazaqstan oblysy