Shymkentte Qazaqstan Respýblıkasy Ulttyq qaýipsizdik komıteti tóraǵasynyń orynbasary – Shekara qyzmetiniń dırektory, general-maıor Darhan Dilmanovtyń tóraǵalyǵymen Shanhaı yntymaqtastyq uıymyna (ShYU) múshe memleketter shekara qyzmeti basshylarynyń tórtinshi májilisi bolyp ótti.
Oǵan qatysýshy alty memlekettiń – Qazaqstan, Qytaı, Qyrǵyzstan, Reseı, Tájikstan jáne О́zbekstan elderiniń ókilderi uıymǵa múshe memleketterdiń shekarasyndaǵy jaǵdaı týraly ózara aqparattarmen almasty. Sondaı-aq, májiliske qatysýshylar terrorıstik elementter ShYU-ǵa múshe memleketterdiń memlekettik shekaralary arqyly shekaralyq aımaqtarǵa enip, ózderiniń zańsyz is-qımyldaryn júzege asyrýǵa tyrysqan jaǵdaılarda olardyń jolyn kesýge baǵyttalǵan ózara yntymaqtastyq pen is-qımyl týraly shartty júzege asyrýǵa arnalǵan is-sharalardyń barysyn talqylady.
Jıynda D.Dilmanov májiliske qatysyp otyrǵan oblys basshysy Beıbit Atamqulovqa sóz berdi.
О́ńir basshysy óz sózinde Ońtústikte 3 mln.-ǵa jýyq halyqtyń, 100-den asa ulttar men ulystardyń yntymaǵy jarasyp, túsinistikte ómir súrip jatqandyǵyn aıtty. Oblys О́zbekstan jáne Qyrǵyzstan memleketterimen shekaralas. Aýyly aralas, qoıy qoralas týysqan eldermen aýyzbirshilik jaqsy bolǵanymen, el ishin ala taıdaı búldiretin sodyrlar azaımaı tur. Sońǵy jyldary esirtki tasymaly máselesi ýshyǵyp keledi. Terrorıstik áreketterdi boldyrmaý úshin Shanhaı yntymaqtastyq uıymyna múshe memleketterdiń birlesken is-qımyly asa qajet. Osyny aıtqan oblys basshysy ShYU jumysyna sáttilik tiledi.
Kezdesýdegi negizgi mindetter naqtylanǵannan keıin májilis jabyq jaǵdaıda ótti. Bul máselege túsinistikpen qaraýǵa bolady. О́ıtkeni, buǵan deıin terrorlyq áreketten aman-saý delinip kelgen Qazaqstannyń ózinde eshkimnen qymsynbaı tapa-taltúste myltyq asynǵan sodyrlar boı kórsetip qaldy. Shanhaı yntymaqtastyq uıymyna múshe alty memleket te beıbit turǵyndardy aýyr qasiretke uryndyratyn qaýipten amanbyz deı almaıdy.
Májilis barysynda oǵan qatysýshylar ShYU shekaralyq keńistiginde zańsyz is-áreketti eskertý men onyń jolyn kesýge baǵyttalǵan «Birlik-2016» birlesip júrgiziletin shekaralyq operasııasynyń mán-jaıyn pysyqtady. Sońynda atqarylǵan jumystarynyń qorytyndysyn shyǵaryp, aldaǵy ýaqytta jasalatyn basqa da josparlardyń jobasyn talqylady.
Májilistiń ekinshi bóliginde qazaqstandyq shekarashylar áriptesterine Qazaqstan Respýblıkasynyń memlekettik shekarasyn kúzetý qalaı uıymdastyrylatyndyǵyn baıandap, shekara kúzetý barysynda qoldanylatyn jańa tehnıkalyq quraldarmen jáne ınnovasııalyq tehnologııalarmen tanystyrdy.
Májilis qorytyndysy boıynsha ShYU-ǵa múshe memleketterdiń memlekettik shekaralaryn kúzetýge, terrorızmge, separatızmge jáne ekstremızmge qatysy bar adamdardyń ótetin arnalaryn kesýge baǵyttalǵan, praktıkalyq yntymaqtastyqty kúsheıtýge arnalǵan kópjaqty, ekijaqty birqatar qujattarǵa qol qoıyldy.
Álemdegi jaǵdaı san qubylyp turǵan kezeńde eshkim kórpesin qymtap, dúnıejúzilik oqıǵalardan qalys qala almaıdy. Shanhaı yntymaqtastyq uıymyna múshe memleketterdiń shekara qyzmetine baılanysty jasasqan túıini – ózara yntymaqtastyqty kúsheıtip, halyqaralyq qaýipsizdikti nyǵaıtý. Mámile osy.
Baqtııar TAIJAN,
«Egemen Qazaqstan»
Ońtústik Qazaqstan oblysy