Qyzylorda oblysy, Qarmaqshy aýdandyq prokýratýrasy bilim bóliminde zańdylyqtyń saqtalýyna tekserý júrgizip, biraz bylyqtyń betin ashty.
Tekserý barysynda mekeme janyndaǵy ortalyqtandyrylǵan esep bólimi esepshileriniń sybaılas jemqorlyq sıpatyndaǵy qylmysqa qadam basyp, memleketke iri mólsherde zalal keltirgeni anyqtaldy. Atap aıtqanda, A.Boranbaeva, G.Kishenova jáne G.Sarymsaqova syndy esep qyzmetkerleri aýdandyq bilim bólimine qarasty mektepterge múldem jumys istemeıtin «óli jandardy» tirkep qoıyp, aı saıyn solarǵa «tıesili» aılyq jalaqyny ózderi bólisip alyp kelgen. Osynyń nátıjesinde olar memlekettiń 8 373 826 teńge aqshasyn qaltalaryna zańsyz basqan.
Atalǵan derek Qylmystyq kodekstiń 189-baby, 3-bóliginiń 1-tarmaǵy boıynsha baqylaýǵa alynyp, aýdandyq prokýratýranyń sotqa deıingi tergep-tekserýdiń biryńǵaı tizilimine tirkeldi. Isti qaraǵan aýdandyq sottyń úkimimen A.Boranbaeva, G.Kishenova jáne G.Sarymsaqova qyzmet babyn asyra paıdalana otyryp, memleket múlkin qoldy etken kináli dep tanyldy. Osyǵan oraı olardyń árbiriniń múlikteri tárkilenip, 5 jyl túrmede otyrý jazasyna kesildi. Alaıda, Kodekstiń 63-babynyń 1-bóligi qoldanylyp, olardy bas bostandyǵynan aıyrý jazasy shartty merzimge aýystyrylyp, 5 jyl synaq merzimi belgilendi.
«Esepshini «esepshi» deı berseń, esirip ketedi» degendi osyndaıda aıtqan eken-aý jurt...
Murat AITQOJA