Sońǵy ýaqyttary Ońtústikte bazar órtený oqıǵalary jıilep ketti. Mamyr aıynyń ózinde «Isataı», sál keıinirek kóterme baǵamen jumys jasaıtyn «Akbar» bazarynda órt shyqty. О́rt sóndirýshiler qýattyń tuıyqtalýynan degenimen, keıbir bazardyń ıelerimen sóıleskenimizde, ózimen básekeles áldekimderden kórip, kijinip otyrǵanyn baıqaǵanbyz. Birinshi sebep ras bola-aq qoısyn, biraq nesıe alyp, óz arbasyn ózi súırep júrgen qarapaıym adamdarǵa óte obal. Qazirgideı ýaqytta shekesi qyzyp júrgen eshkim joq qoı.
Jaqynda qalalyq ákimdikte bazardaǵy órt sebepteri jáne onyń aldyn alýǵa baılanysty jıyn ótti. Ákimdikten bólek, tótenshe jaǵdaılar departamenti jáne kásipkerler qatysqan jıynda Shymkenttegi 33 bazardyń 20-sy óte qaýipti jaǵdaıda ekeni aıtyldy. Mamandardyń zerdeleýi boıynsha, barlyq bazarlarda rekonstrýksııa júrgizilip, onsyz da tar saýda alańdary aýmaǵynda núktelerdi kóbeıtken. Bazar qojaıynyna qosymsha tabys kózi bolǵanymen, taýarly materıaldyq baǵaly dúnıeler shekten tys kóbeıip, esesine órtke qarsy sharalardy iske asyrýǵa múmkindikter meılinshe azaıǵan.
О́rtke qarsy normalar boıynsha bazardaǵy qoımalar men saýda núkteleriniń arasynda qalyń qabyrǵa bolý kerek. Alaıda, bir jerden shyqqan órttiń ekinshi jaqqa ótpeýdiń aldyn alatyn órtke qarsy qabyrǵalar Shymkenttegi barlyq bazardyń birinde joq. Máselen, 2014 jyly jeti órt, 2015 jyly tórt, al sońǵy bes aıda úsh órttiń shyǵý sebepteri osyndaı qorqaýlyq nıette jatyr.
Taldaý materıaldary kórsetkendeı órttiń shyǵýy negizinen elektr toqtarynyń tuıyqtalýynan bolady eken. О́rt saldarynan bazar ıesi men kásipkerler 1 mlrd. 885 mln. teńge shyǵyn kórgen.
Shymkent qalasy ákimdiginde ótken jıynda qala ákimi Ǵ.Ábdirahymov tıisti oryndarǵa qala bazarlaryna taldaý jasap, órt shyǵý qaýipsizdiginiń aldyn alý sharalaryn kúsheıtýdi tapsyrdy.
Baqtııar TAIJAN,
«Egemen Qazaqstan»
Ońtústik Qazaqstan oblysy