kásipker týǵan jerine sport keshenin salyp berdi
Osydan eki jyl buryn kórshi qyrǵyz elimen aýyly aralas, qoıy qoralas jatqan Qordaı aýdanyndaǵy Qarakemer aýylynda úlken sport kesheniniń qazyǵy qaǵylyp, qurylysy bastalǵan bolatyn. Mine, ótken aptada osynaý ásem ǵımarattyń tusaýy kesildi. «Otaý stroı» JShS prezıdenti, osy aýyldyń túlegi Qaırat Moldaseıitov týǵan aýyly, bilim alǵan qasıetti shańyraǵy men ustazdaryna, jalpy jerlesterine degen qurmetin, taǵzymyn, ystyq yqylasyn osylaı bildirdi.
«Dáýletti bolsań, elińe paıdań tısin», degen bıznes áleminde kóptegen bıikterdi baǵyndyryp, ońdy tirlikterimen tanylǵan «Otaý-stroı»-dy el bir jaǵy qaıyrymdy isterimen de jaqsy biledi. Buǵan deıin osy kompanııa óz demeýshiligimen kıeli Túrkistan qalasynda 16 páterlik úıdiń qurylysyn salyp, 16-synyń da kiltin turmysy tómen, múgedek jandarǵa tabys etkenin, odan bólek dál osy qasıetti qalada múgedek balalardy ońaltý ortalyǵyn da óz qarjylaryna salyp, paıdalanýǵa bergenin, Shymkent qalasynda da birqatar ıgilikti ister atqarǵanyn aqparat quraldary jazǵan bolatyn. Sondaı-aq, Qaırat Moldaseıitov osydan eki-úsh jyl buryn Qarakemerge 100 oryndyq balabaqsha men meshit, emhana salyp berip, týǵan aýylynyń alǵysyn alǵan-dy.
«Áleýmettik jaýapkershilik turǵysynan memleket negizinen óz jolynan ótti, tutastaı alǵanda óziniń osy fýnksııasyn tıimdi oryndady. Endi – kezek bıznestiki...» degen bolatyn Elbasy Nursultan Nazarbaev. Osy turǵydan kelgende «Otaý-stroı» JShS Elbasy amanatyna adaldyq tanytyp júrgen mekeme ekenin moıyndaýymyz kerek. Bul sport kesheniniń aýyldyń damýyna jáne jastar arasynda salamatty ómir saltyn keńinen nasıhattaýǵa qosar úlesi zor. «Men osy sport kesheninen bolashaqta elimizdi álemge tanytatyn sportshylar shyǵatynyna bek senimdimin. Jalpy, bul bizdiń kompanııanyń alǵashqy nemese sońǵy is-sharasy emes. Aldaǵy ýaqytta mundaı ıgilikti ister jalǵasyn taba beredi», deıdi bul jóninde Q.Moldaseıitov.
Jańa sport kesheninde kúres, boks, fýtbol jáne fıtnes klýbtary jumys isteıtin bolady. Iаǵnı, aýyl turǵyndary úshin sporttyq jattyǵý jasaýǵa keń jol ashyldy. Keshende 144 sharshy metrdi quraıtyn kúres kilemi jáne úlken rıng ornatylǵan. Buǵan qosa fýtbol alańy bar. Zamanaýı keshende aýdan jasóspirimderiniń sportpen shuǵyldanyp, úlken jarystarǵa daıyndyq jasaýǵa múmkindikteri mol.
Oralhan DÁÝIT,
«Egemen Qazaqstan»
Jambyl oblysy