Boz ǵalamnyń...
Boz dalamnyń kózi – qan...
Kúnáharlar silkidi oıdy qozynan.
Qazaq Eli aza tutyp, qaıǵyrdy:
Qapııada oq jalyndy boz ulan.
Bozdady ana...
Bozdady jer, boz aspan,
bar ma, sirá, aza jyrdan sóz asqan?
Ajal qapty Ibilistiń oǵynan
qyrshyn jigit jańa-jańa kóz ashqan...
Qatygezdik óńdi qoıyp, túske endi.
Qaıǵy...
Ýaıym...
El kózinde tistendi.
Jańa dáýir jańyldyryp pendesin,
Qalaı?
Qashan?
Janalǵyshtar «ishtendi»?!.
Bir shókim bult jel qýalap, qara, áni,
Aqtóbeniń aspanymen tarady.
Qazaq qashan bir-birine oq atqan?
Oıdan qalyń julyn, júıke jaraly.
Janarlardy torlap tuman, muz qaıǵy,
Sana tońyp, júrek qatty syzdaıdy...
Azat eldiń kezip kógin aýyr ún,
Sýyq saryn sharlady kep túzdi, aıdy.
Neden?
Nege?
Saıtanǵa erip, sýystyń?
Eı, jetkinshek!
Azaptandym... Ý ishtim...
Ultym menen urpaǵyma alańdap,
Sózin aıttym qasiretti týystyń.
Júrek sherli... Del-sal kúıde tur denem...
Qalaı?
Qaıtip kirdi jylan irgeden?
Analarǵa basý aıtyp qaraly,
Bozdaqtarǵa joqtaý aıttym jyrmenen.
Bilem dáýir óz túıinin sheshedi...
(Quryp ketsin jer ústiniń ósegi!)
Keń dalamnyń bútindigin tolǵaǵan
babalarǵa ne deıin men keshegi?!
Sózi minsiz... Jaralǵandaı quryshtan,
Edil, Jaıyq, Ertis úshin urysqan,
Alataý men Qarataýyn qalqan qyp,
Sary belde – Saryarqada turysqan...
Babalarǵa – danalarǵa ne deıin?
Sóz taba almaı, sýsyp otyr ógeı ún?
Tamyrymdy saqtaý úshin Táýelsiz,
Aza tutyp, jalynymdy tógeıin!
Oısha tizip dáýirlerdi qus ilgen,
kómek surap Kóktegi Uly Kúshimnen;
Aza jyryn aq qaǵazǵa túsirdim,
urpaq úshin qatelespeý úshin men.
Boz Dalamnyń...
Boz Ǵalamnyń kózi – qan.
Surqııalar silkidi oıdy qozynan.
Alashymnyń kózin súrtip óleńmen,
Uly Jurtqa kóńil aıttym...
Qosh!
Baqul bol!
Boz ulan!
Nurlan ORAZALIN,
senator, Qazaqstan Respýblıkasy Memlekettik syılyǵynyń laýreaty