Otanyma oralǵanyma esh ókinbeımin

deıdi «Jas qanat-2016» jeńimpazy Parasat Otan Semeıde qazaqstandyq jas oryndaýshylar arasynda jyl saıyn dástúrli túrde ótetin respýblıkalyq «Jas Qanat» konkýrsynda bas báıgeni jeńip alǵan ánshige arnalǵan jeke baspasóz máslıhaty ótti. 22 jasar Parasat Otan bul kúnderi Ámire Qashaýbaev atyndaǵy memlekettik fılarmonııada eńbek etedi. Parasat Qytaıda týyp-ó­s­ken. 2007 jyly ol otbasymen atamekenine oralǵanda qýa­nysh­tarynda shek bolmady. Olar Shyǵys Qazaqstan oblysy, Úrjar aýda­nyndaǵy Blagodarnoe aýylyna qonystanady. Aıta ketý kerek, arǵy atalary kezinde Qy­taı­ǵa ótkenmen, sol jaqta tursa da, salt-dástúrlerine berik bolypty. Olardyń otbasynyń bir erek­sheligi, er adamdarynyń án­shilik qabileti. Ákelerine tartyp, bári de án salady eken. Ákesi – Para­satqa qazaq ánderin úıretken al­ǵashqy tálimgeri. Parasat aýyl mek­tebinde bilim ala júrip, án salýyn da jalǵastyra berdi. Osy­dan bes jyl buryn Shákárim atyn­daǵy memlekettik ýnıversıtetke túsip, kásibı mýzykant bolýdy maqsat tutady. Ol mýzy­ka kafedrasyndaǵy ustazy QR mádenıet qaıratkeri, professor Aıtmuhambet Beısembekovke erekshe rıza, «Atamekenime oral­ǵanyma esh ókinbeımin, osyndaı ulaǵatty jandardyń tálimin kórdim» dedi baspasóz máslıhaty barysynda aǵynan jarylyp. Ustazy uzaq jyldar boıy Parasattyń daýysyn qoıyp, bilimin tereńdetken. Nátıjesi oıdaǵydaı, bul kúnderi vokalıst Parasat halyq ánderimen qosa, qazirgi zamanaýı ánderdi, klassıkany qatar alyp júredi. «Jas qanat-2016» konkýrsyna qatysý ońaı emes, synǵa tús­kender barlyq talap údesinen shyǵa bilý kerek. Fılarmonııanyń kórkemdik jetekshisi Qadylbek Omarovtyń aıtýynsha, Parasat ádilqazylar alqasynyń naza­ryna usynylatyn ánderdi ózi iriktep, tańdaǵan. «Jorǵa taı» atty halyq ánin estradaǵa laıyq­tap oryndaǵandyqtan, alǵashqy ánimen-aq tyńdaý­shylardyń kó­ńilin baýrapty. Ádilqazylardyń barlyǵy, tipti, búkil kórermen birden oryndarynan tura qol shapalaqtap, qoshemet kórsetken. Ekinshi týrda ol ıspan ánin oryndasa, fınalda ıtalııalyq «Izabel» ánin naqyshyna keltire shyrqaǵan. Mine, osylaısha bıik shyńdy baǵyndyra bilgen jas talant Semeıge oralyp, fılarmonııadaǵy eńbek jolyn jalǵastyrýda. Degenmen, «áttegen-aı» deıtin tus ta joq emes, baspasóz más­lıhatyna qatysýshy Zıınýra Abdoldınovanyń aıtýynsha, jas otbasyly Parasattyń ázirshe jeke baspanaǵa qol jetkizýi qıyn bolyp tur. Ol kelinshegi jáne jas sábıimen stýdenttik jataqhananyń aıadaı bólmesinde turyp jatsa kerek. Raýshan NUǴMANBEKOVA SEMEI