Qydyrııanyń Fınlıandııaǵa saıahaty

Sýomıdiń ormandy alqabynda arqyraı kisinegen kúreń qasqa aǵa mal dárigeriniń kózine nege jas úıirdi?! Qydyrııa kóp sóılemeıdi, kóp kúlmeıdi. Júrisi baıaý, qımyly shaban... Soǵan qaramastan tirligine tap-tuınaqtaı, tapsyrylǵan sharýany shashaý shyǵarmaı oryndap tastaıtyn yqtııatty, ózine óte-móte muqııat jan. Aıtpaqshy, Qydyrııanyń sonaý jyldary memlekettik mańyzy zor tapsyrma oryndaǵanyn aýyldastary men zamandastary, kúlli Shıeli tóńiregi jaqsy biledi!.. Biraq, jyldar alǵa jyljyp ótken saıyn ol jaıynda jurt ta umyta bastaǵandaı, Qydyrııa da ol sapary týraly qaıtalaı aıtyp jatpapty. Minezi solaı. Sonymen, bul Qydyrııa – kim? Qydyrııa Álıakbaruly Kúlibaev Shıelidegi keshegi «Telikól» qarakól qoı keńsharynyń, keshegi aǵa mal dárigeri... О́mirde mundaı jandarmen ushy­rasatyny, mundaı sátter bolatyny Qydyrııanyń túsine de kirmegen! Júzinen ımany tógilgendeı Fınlıandııa Prezıdenti Maýno Koıvısto Qy­dyrııanyń qolyn qysyp turyp aýdarmashy jigit arqyly: «Prezıdentińiz Nursultan Nazarbaevqa menen sálem aıtyńyz, sheksiz alǵysymdy jetkizińiz!» degen sózi áli kúnge deıin qulaǵynda. «Sizdiń Prezıdentińiz...» dep bóle-jara aıtty-aý. Bul sapardyń memlekettik máni baryn Qydyrııa sonda túsindi. Arada qansha jyl ótti, Sýomıge saıahat bir sátke de jadynan shyqqan emes. Fın Prezıdentiniń aldynda «maqul» dep kúlimsirep bas ızegenimen Qydyrııa qazaq Prezıdentine ol sálemdi týra sol qalpynda óz aýzymen jetkize almady. Nege deısiz be?! Oǵan sebep, qaıtar jolǵa fın jaǵy avıabıletti eki baǵytta usyndy: biri – Almaty, ekinshisi – Tashkent. Ári tolqyp, ári júregi tarsyldap, aýylǵa asyǵyp alyp-ushyp turǵan Qydyrııa bıletti Tashkentke deıin dep, ushaqtan túsken boıda jaqyn jerden týǵan Shıelisine tartyp ketpek nıet tanytty. Munysy kádýilgi aýyl balasyna tán uıańdyq pa, álde momyndyq pa, Qydyrııanyń óz basy osy kúnge deıin onyń ara-jigin durystap ajyratyp kórgen de emes. Tek umytpaıtyny – Almatyǵa bara qalsa, Prezıdent Nursultan Ábishuly aldynan shyǵyp: «Iá, Qydyrııa... Kúreń qasqa – Zaslen Fınlıandııaǵa qalaı jetti... Tórt aıaǵyn teń basyp, terbelip bıledi me?» degen saýal qoıatyndaı kórindi!? «Sonda ne aıtam...» dep qaradaı qatty qysylyp, mańdaıynan sýyq ter burq etetin! It tumsyǵy batpaıtyn jynysty qalyń ormanǵa moınyn tik soza kisinep, mýzykaǵa qulaq aspaı... jer tarpyǵan kúreń qasqanyń symbatty sulý músini kóz aldyna kóldeneńdep tura qalatyn... Sol qalpymen kúreń qasqa talaı ret túsine de kirdi!.. Qydyrııanyń alǵashqy oqyp-toqyp dıplommen alǵan mamandyǵy – mal dárigeri. Qyzmetiniń eń óskendegi dárejesi keńshar boıynsha aǵa mal dárigeri. Eshteńe de, eshnárse de esten shyqqan joq. E-e, nesin aıtasyz! Keńshardyń keregesi ketpeı, kemtarlyq jetpeı turǵan mamyrajaı zaman edi. Bir kúni aýdannan Qydyrııa Kúlibaevtyń atyna: «Bar táýirin daıar­lap, el astanasy Almatyǵa jınalsyn», degen shuǵyl tapsyrma tústi. Dúnıejúziniń qazaqtary tuńǵysh ret Almatyda bas qospaq deıdi. Tiziltip kıiz úı tigip, qandastarǵa saltanat kórsetý qyzylordalyqtardyń moınyna júktelipti. Kúreń qasqa Zaslendi alǵa salyp, keńshardyń aǵa mal dárigeri Kúlibaev bastaǵan top yrǵalmaı-jyrǵalmaı tez arada astanaǵa jetip, taban tiredi. Qazirgi «Atakent» atalatyn, ol kezde Halyq sharýashylyǵy jetistikteri kórmesi – tórden oryn alyp, jaılasty. Qazaqstan – óz Táýelsizdiginiń 1 jyldyq merekesin bar pármenimen atap ótýge daıyndalyp jatqan. Shetelden kelgen qandastar qazaq dástúri men qazaq tiliniń qaımaǵy buzylmaǵan Syr eliniń aq dastarqanynan dám tatyp, qaz-qatar turǵan alty qanat aq otaýlarǵa kirip-shyǵyp, aıran-asyr shattandy. Taǵdyr táleıimen jatjurttyqqa aınala bastaǵan qandastarmen qaýyshyp, syr alysý saltanatynan Qydyrııa da tys qalmady. Aýyldastary sekildi, Qydyrııanyń da tóbesi kókke bir eli jetpeı júrdi. Netken ǵanıbet! «Tú-ý... deseńizshi, qazaqtar dúnıejúzine taradaı shashylyp ketipti-aý, tegi. Estimegen elden keldi. Shvesııa, Kanada, Malaızııa deı me... Túrkııa... Jańa Zelandııa deı me, atynyń ózinen at úrkip, tiliń súrinedi». Sol kúni sarala japyraqtar qalqyp úzilip, ózi stýdenttik shaǵyn ótkizgen ásem Almaty altyndaı tań shapaǵyna shomylyp, sondaı ádemi oıandy. Bári de este. 1992 jyldyń 29 qyrkúıegi. Kórmedegi qyzylordalyq qonysqa: «Túske taıaý osynda Nazarbaev keledi eken! Qasynda sheteldiń Prezıdenti bar deıdi...» degen habar jetip, aıaq-astynan abyr-sabyr bastaldy. «Prezıdent» degen jańa sózdiń ózine qulaq úırete almaı jatqan aǵaıyn, sheteldik Prezıdentten de, bir kórýge qushtar bolyp júrgen óz Prezıdentiniń keletinine quraq ushyp, zyr júgirdi. Aıtyp aýyz jıǵansha bolǵan joq, mańdaıy jarqyrap Nursultan Nazarbaev bastaǵan syrbaz top bularmen betpe-bet ushyrasyp, qarsy aldarynda jymıyp turdy. Qydyrııanyń el basshysyn óte jaqynnan birinshi kórýi. Oblys basshysy Seıilbek Shaýhamanov ta qasynda eken. Nurekeńnen bastap bar qonaq uzyn boıly, dóńgelek jyly júzdi, sap-sary shashty mártebeli bir meımanǵa erekshe ańsary aýyp, qurmet kórsetip jatty. Osy arada Nursultan Nazarbaev sóz aldy: – Dúnıejúzi qazaqtarynyń 1 Quryltaıy ústinde, bizdi, el Táýel­sizdiginiń 1 jyldyq mereıtoıymen quttyqtap Fınlıandııa Prezıdenti Maýna Koıvısto myrzanyń arnaıy saparmen kelgenin sizderge aıtqym keledi. Osy kórmedegi qanymyzǵa da janymyzǵa jaqyn sizderdiń «Aýyl» qalashyǵyna mártebeli meımandy ádeıi ertip kelip turmyn. Káne, qandaı ónerlerińiz bar, alystan kelgen meımanǵa kórsetińizder... Prezıdent sózin aıaqtaǵan boıda daıyn turǵan qyzdar tosylmaı án salyp, jigitter kúmbirlete kúı tartty. Mártebeli qonaq – rıza. Meıirlene kúlimsirep qol soqty. Fınlıandııa Prezıdentine, ásirese, «Telikóldiń» «juldyzy» – kúreń qasqa Zaslenniń tórt aıaǵyn silkip tastap, teń basyp, bir orynda taıpalyp bılegeni erekshe unady. Onysyn jurt baıqap qaldy... Fın Prezıdenti Maýno Koıvıs­tonyń kúreń qasqany attaı qalap alǵany týraly Qydyrııa alǵash keńshardyń dırektory Nurbek Esjanovtyń aýzynan estidi. Nursultan Nazarbaev sheteldik meımannyń meselin qaıtarmaı, kúreń qasqa júırikti Sýomı eliniń patshasyna syıǵa tartypty. «Al, Qydyrııa, jolǵa daıyndal, bul tapsyrmany oryndaýǵa senen basqa laıyqty adam joq!» degen dırektordyń aıtqanyna, Qydyrııanyń qapelimde aýzyna túsken sózi: «Qashan?!» boldy. Sol: «Qashan?!» keler jyldyń naýryzynyń basynda júzege asty. Jas memlekettiń shetelmen jeke-dara qatynasy óz aldyna, onyń memleketaralyq alys-beris qujattaryn daıyndaýǵa ǵana 7 aı ýaqyt ketti!.. Shıeli deposynan shyqqan júk vagonyna aýzy-murnynan shyǵa azyq-túlik, jem-shóp, bóshke-bóshke sý tıeldi... Vagonnyń bir buryshynan Zaslenge arnalyp qora turǵyzyldy, ekinshi buryshynan kútýshilerge jaǵdaıy jaqsy jatyn oryn saılandy. Qydyrııanyń qasyna serik bolyp keńshardyń baıyrǵy jylqyshysy Tıyshtyq Syzdyqov aqsaqal qosyldy. Bul sapar búgin-erteń jasy 35-ke tolǵaly turǵan Qydyrııaǵa qyzyq kórindi. Anaý-mynaý emes, Eýropanyń ıyǵyndaǵy Fınlıandııaǵa – Sýomı eline saıahattap barady! Saıahat bolǵanda qandaı-ı?! Qar ketkenmen, qara sýyq basym. Jylqyshy aǵasy ekeýi orys peshi «býrjýıkaǵa» kómirdi kezek-kezek laqtyryp, jylynady. Bir-biriniń kúıelesh-kúıelesh bolǵan túrlerine kúlise júrip, qyzyqtaı júrip, Máskeýge jetti. Júk poıyzynan aǵytylyp alynǵan «qazaq vagony» samsaǵan kóp vagonnan alshaqqa, tuıyq buryshqa tyǵylyp qoıyldy. «Kimsiń», degen kisi joq. «Biz Fınlıandııaǵa baramyz, tranzıtpiz degen» elden estigen sózdi on qaıtalasa da, oǵan qulaq asar bir pende tabylmady... «Shetelge bara jatyrsyń...» dep kelinshegi qyr sap bergen shalbary men pıdjagin merziminen buryn kıip alǵan Qydyrııa depo men «qazaq vagonnyń» arasyndaǵy júz san relsti attap júrip, jol qyldy. Sharshady. Qyryq taraý, toqsan torap bolyp shıyrlasyp jatqan, ómirinde taraq kórmegen qolań shashtaı uıysqan temirjoldy Qydyrııanyń óz basy osy Máskeýde kórdi. Izdep, suraý salmasań, barmasań myna shym-shytyryq shıyrlasqan temirjoldyń arasynda iz-túzsiz joǵalyp ketýiń kámil. О́tken bes kún ishinde vagon men deponyń ortasyn shań qylǵan Qydyrııanyń toıǵa kıer shalbarynyń tizesi syr berip, shodyraıyp shyqty. Altynshy kún degende, áıteýir, jol ashyldy. Máskeýdiń Belarýs baǵytyndaǵy stansasynyń deposynda saǵatty saǵatqa uryp qur bosqa otyrǵan joq Qydyrııa, birqatar qazaqqa tanymal laýazymdy azamattardyń aty-jónin jattap, qoıyn dápterine aıshyqtap jazyp aldy. Sol kezdegi Kólik mınıstri Nyǵmetjan Qabataıuly Esenǵarın, Syrtqy ekonomıkalyq baılanys mınıstri Syzdyq Jumataıuly Ábishev, Máskeýdegi jańadan qurylǵan «Qazaqstan-Kommersııa» syrtqy ekonomıkalyq óńirlik ókildiginiń tóraǵasy Sábıt Qaıyruly Jadanov, Mınıstrler Kabınetiniń kómekshileri О́tegenov pen Golýb – osynshama adam Máskeý deposynyń bir buryshynda qańtarylyp turǵan «qazaq vagonynyń» Batysqa bet alýy úshin, kúreń qasqa úshin... kúni-túni tynbaı eńbektenip ter tókti. Tyǵyryqtan shyǵar jol izdedi. Qydyrııa depoda otyryp Úkimettegi eki kómekshimen kún qurǵatpaı telefon arqyly sóılesip turdy. Bir kúni Máskeýdegi fın konsýly kelip, taıaý ýaqytta istiń oń sheshiletinin aıtyp qýantyp, toıǵa kıetindeı appaq bes saýsaqty bir býma qolǵapty tas­tap ketti. Ony kıip kómir ustaǵanǵa obal!.. Shıeliden alyp shyqqan brezent qolǵaptyń da saý-tamtyǵy qalmaı jyrtylǵan. Konsýl myrza ony qalaı ǵana baıqap qoıdy eken... Depoda budan da basqa qyzyqtar boldy. Kóztanys bop qalǵan deponyń egde tartqan bir azamaty Qydyrııaǵa tosynnan saýal qoıdy. – Káýap jasaı alasyń ba? – Árıne, jasaı alamyn. Ne boldy? – degen Qydyrııanyń tańdanysyna máskeýlik temirjolshy: – Sender bul stansadan jýyq arada uzap shyǵa almaısyńdar. Anaý jemge toımaıtyn atyńdy aryqtamaı turǵanda káýap jasap, jep almaısyńdar ma? – degeni. – Bizde káýapty qoı etinen jasaıdy!.. Kisiniń jany qysylyp, joldyń jaıyn oılap, azyp-tozyp júrgendegi estigeni osy. Búkil keńse toly adamdar keńseni basyna kóterip kúlip jatyr. Netken biraýyzdy halyq! Biriniń aýzyna biri túkirip qoıǵandaı. «Shirkin, kúreń qasqa! Qadirińdi, seniń mıllıon rýblge baǵalanatyn qunyńdy bilmeıdi-aý, myna jazǵandar... Jer sharynda qazaqtan asqan baýyrmal halyq joq eken ǵoı, teginde. Kimge bolsyn, qandaı jaǵdaı bolsyn qol ushyn sozýǵa ázir. Aýyzyndaǵysyn jyryp beredi...» Alty kúndik Máskeý aıaldamasy ji­gittiń bolashaq ómirine zor sabaq boldy. Bir kún, bir tún júrip Lenıngrad pen Vyborg qalalaryn artqa tastap Lýjaıka stansasyna tumsyq tiregende, endigi aıaldama – fın shekarasy degen habar aldy. Qansha qısynsyz sóz estise de Máskeý óz jeri, óz aýylyndaı eken, til bilmeıtin eldegi endigi tirligimiz ne bolar eken degen qobaljý bastaldy. «Kúıelesh» vagon shekaraǵa jetpeı toqtady. Kúreń qasqanyń jem-shóbi, ózderiniń jelinbeı qalǵan jarmasy men ishilmegen shaı-paıy... Sýomı elimen alǵash tanystyrǵan konsýl bergen aq qolǵap býmasymen, túp-túgel sol vagonda qaldy. Qol sómkesin kóterip, aýdarma­shynyń sońynan erip, buryshtan shyǵa bergeni sol eken, o toba, bulaı dep kim oılaǵan?! Úrlemeli aspappen aıaq astynan mýzyka oınap bersin. Qyzyl qońyr kesek tastan ádemilep qıystyryp, órilip tóselgen alańnyń tór jaǵynda moıyndaryna galstýk taqqan, kostıým kıgen, kil uzyn boıly bir top er kisiniń qarasy kórindi. Mýzykanttar mártebeli toptyń oń jaǵynan oryn alypty. Aýdarmashynyń nusqaýymen alqyzyl lenta tartylǵan jolaqqa ımene aıaq basqan Qydyrııa men Tıyshtyq aqsaqaldyń aldynan ulttyq kıim kıgen eki qyz nan men tuz alyp shyqty. Mine, qurmet! Mine, qoshemet! Qazaqstanǵa, respýblıkanyń Prezıdentine qurmet jasalyp jatyr! Qalaı tolqymaısyń! Toptyń ishinde bir mınıstr men basqa laýazymdy adamdardyń júrgeni Qydyrııanyń esinde qalypty. Saltanatty mıtıngiden uqqany – shekaraǵa taıaý ornalasqan shahardyń basshysy elge tuńǵysh ret resmı túrde qadam basqan qazaqtardy ózi bas bolyp memlekettik dárejede qabyldaý jasaǵany eken. Shahardyń aty – Vaınıkkala (Vainikkala) edi. Temirjol beketiniń basynda sáıgúlikten qan alyndy. Tólqujaty muqııat tekserildi. Arnaıy orynǵa aparyp, tula boıy suıyq sabynmen jýyp-shaıylyp, tazartyldy. Áriptesi – mal dárigeri Mate Roýz esimdi jigit Qydyrııamen beıne kópten kórmegen eski týysyndaı shúıirkelesti. О́ziniń orys tilin bir kisideı biletinin qaıtersiz!? Kıevte dáris alypty. Ár áriptiń dybysyn sozyp sóılegeni bolmasa, sózi óte uǵynyqty. Aýdarmashymen birge júrgen Fın Prezıdenti adıýtantynyń esimi Karı Kaasýrýneen edi. Túsi sýyq, kóp sóılemeıtin kisi. Sonymen, Qydyrııalardyń kóz aldynda kúreń qasqa buryn-sońdy kórmegen erekshe jyltyldaǵan kúımege kirgizilip, ol kúımeni dybysy bilinbeıtin erekshe jeńil kólik súıreı ala jóneldi. Eki qazaq ertegiler elinde júrgendeı! Rasynda da 5 myń shaqyrym joldy artqa tastap kelgen qazaqtar beıtanys jerde óń men tústi ajyrata almaı qaldy... Fermada bulardy Prezıdent Maýno Koıvısto men onyń boıjetken eki qyzy qarsy aldy. Asta-tók dastarqan jaıylypty. Dastarqan basynda Prezıdent sóıledi. Jas respýblıka Qazaqstannyń bolashaǵyna dańǵyl jol tiledi. Uly dalany mekendegen jaýger-nomadtyń urpaǵyna dep, atap aıtyp, bularǵa qanjar tektes bir-bir pyshaq syılady. Ony Prezıdent óz qolymen tapsyrdy. Kim biledi, Sýomı eliniń qonaq kútýdegi salt-dástúri solaı shyǵar, biraq, Tıyshtyq aqsaqal tıysh turmaı: «Bizdiń saltymyzda jaqyn adamdar bir-birine pyshaq syılamaıdy, sondyqtan biz satyp alaıyq», dep qaltasynan quny kete bastaǵan keńestik qyzyl qulaq eki on somdyqty shyǵaryp dastarqannyń ústine qoıdy. Qydyrııa ornynan turyp, bas ızep, aǵasyn qoldady. Baıqaǵany, fın jaǵy aýdarmashynyń sózinen keıin muny durys túsingen sekildi, tipti, jaıdary qaýqyldasyp, qol shapalaqtady... As ishilip, kóńildi top syrtqa shyqqanda kóktem shyǵyp úlgermese de kókpeńbek bolyp qulpyryp turǵan kók óskinnen qazaqy janýar kúrt-kúrt shaınap tur eken. Dereý mýzyka qoıyldy. Prezıdenttiń qyzdary maıysyp, Zaslennen kóz alar emes. «Al basta, Zaslen!..» dedi Qydyrııa daýystap. Kúreń qasqa qannen-qapersiz. Mýzykaǵa qulaq asqan joq. Álden ýaqytta... ıt tumsyǵy batpaıtyn jynysty qalyń ormanǵa moınyn soza arqyraı kisinep, jer tarpydy. Sóıtti de túk bolmaǵandaı kók óskinge qaıta bas qoıdy. «Zaslen, munyń ne? Káne, bıge bas!» Qydyrııa sáıgúliktiń janyna jetip bardy. Kekilin tarap, jalynan sıpady. «Káne, kúreń qasqa, kórset ónerińdi...» Tıyshtyq aqsaqal da munyń artynan enteleı jetipti: «Kúıi bolmaı tur ǵoı, shamasy. Jersinbeı jatyr-aý, janýar. О́z-ózine kelip alsyn, bıleıdi ǵoı...» dep jatyr. Basyn shuǵyl kóterip, qara ormanǵa qarap oqyranǵan janýardyń sharasy keń janarynda jas tamshysynyń tolyp qalǵanyn baıqaǵandaı boldy Qydyrııa. Aqyldy janýar ıesine munysyn baıqatpaıynshy degendeı-aq basyn tómen salyp, kók shópti ıiskelep, termelep, byrt-byrt úze berdi. Iyǵyna qolyn salǵan áriptesi Mate eken. – Qam jeme, Qydyr... Zaslen óte alys jol júrdi. Sýomı jerine eti úırengen soń, ol bıleıdi... – dep orysshasyn sozyp sóılep, kúlip tur. Mate Roýzdiń: «Aadapteıshn, aadapteıshn...» degen sózi Qydyrııanyń qulazyǵan kóńiline dem bergendeı áser etti. «Mate de mal dárigeri ǵoı, birdeńeni biletin shyǵar, adaptasııadan ótsin dep tur ǵoı...» dep ózin-ózi ishteı jubatqandaı bolyp, kúreń qasqanyń sharasy úlken qara kózderine taǵy bir zer saldy. O, toba! At ta adam sekildi-aı!.. Qydyrııanyń kóńili bosap, kózine jas úıirilgeni... «Qosh, saý bol, kúreń qasqa – Zaslen, janýarym!..» 1994 jyly Shıelidegi «Telikól» qarakól qoı keńshary birjolata tarady. Prezıdent tapsyrmasyn oryndaǵan keńshardyń aǵa mal dárigeri Qydyrııa Kúlibaev jumyssyz qaldy. Qur bekerge qarap jatpady, ózi aıtqandaı, zaman talabyna saı el qatarly mamandyǵyn aýystyryp, kásibin túrlendirip úlgerdi. Shıeli temirjol stansasynda operator-defektoskop qyzmetin atqarady. Qudaıdyń qutty kúni arly-berli júrip ótetin on bes shaqyrym jaıaý júriste temirjoldyń tabanynda qandaı kinárat bar, sony birinshi baıqaıtyn naǵyz qyraǵy kóz mamanyńyz Qydyrııa bolyp aldy! Batystan Shyǵysqa, Shyǵystan Batysqa damyl tappaı kúni-túni zaý­laıtyn on san poıyz Qydyrııanyń arqasynda sebep-saldarsyz toqtamady. Sóıtip, ótken 19 jyldyń ishinde bul Qydyrııa Kúlibaev Jer sharyn ekvatormen eki aınalyp shyqqandaı jol júrip tastapty! Aıdalada, shaqyrymdardy artqa tastap kele jatqanda keshegi aǵa mal dárigeri Qydyrııanyń oıyna ne kelip, ne ketpeıdi?! Talaı ret kúreń qasqa arqyrap kisinegendeı bop artyna jaltaq-jaltaq qaraıtyn... Janýardyń daýysy alystaǵy saǵym arasynan talyp jetkendeı kúı keshetin. Tereń oı ústinde qalatyn kezdeısoq tanysymnyń júregin qansha jerden tyrmalaǵym kelmese de: – Qydeke, moınyńyzdaǵy júkti túsirý úshin sol joly Tashkentti qoıyp, nege tip-tike Almatyǵa ushpa­dyńyz? Nege Prezıdenttiń sálemin óz aý­zy­ńyz­dan Prezıdentke jetkizbedińiz? – deı­min ǵoı baıaǵy. –Balalyq qoı, áı, balalyq... Elbasyna ne aıtam degen uıańdyq basym tústi?! Biz ketken soń óz-ózine kelgen janýar Sýomıdiń kókmaısasyn keship turyp, adam sekildi 62 tamyry ezilip turyp, uzyn sıraqtaryn silkip tastap, bılegen de shyǵar-aý... О́tti-ketti ne deımin... Aman-esen baryp, Prezıdenttiń amanatyn tapsyrǵanymyz týraly aýdan basshylary oblys basshylaryna jetkizdi, oblys basshysy Prezıdentke aıtty degen habardy estidik te, sonymen bolǵan oqıǵa kómeskilene berdi. Onyń ústine óte kúshti damyǵan eldiń turmysyn óńimiz túgili túsimizde kórmegen biz beıbaqtar, aýzymyz ashylyp, kózimiz jumylyp eseńgirep qaldyq qoı, nesin jasyraıyn! Sodan beri de arada 25 jylǵa jýyq ýaqyt ótipti. Bizdiń Qazaqstan dál sol kezdegi fınderdiń dárejesine jetedi dep kim oılaǵan!? Asyp ta kettik-aý deımin. Qazir Astana men Almatyǵa barǵanda sondaı oıda qalamyn. Zaman kóshi tez júredi eken ǵoı, – deıdi Qydyrııa qyzaraqtap. Prezıdent Maýno Koıvıstonyń tikeleı tapsyrmasy boıynsha qazaq­stan­dyq qonaqtar úsh kún arnaıy ja­saqtalǵan jaltyldaǵan kólikten túspeı qydyrady. Gıper-sýpermarketter óz aldyna, aımaqtaǵy sút fermalary men et kombınatyn aralaıdy. Helsınkı, Týrký, Saýkele qalalaryn armansyz sharlaıdy. Eldiń atyn tanytyp, shetelge saıahattap qaıtqan Qydyrııa úshin ol sapar qııal-ǵajaıyp ertegimen para-par. – Onyń mańyzyn aıtsaıshy, shirkin, mańyzyn... Átteń, kesh bildim ǵoı... – dep, kóp kúlmeıtin Qydyrııa muńaı­ǵandaı bolyp, bir jymıyp qoıdy. Osy Qydyrııa Kúlibaev sııaqty mańyzdy tapsyrmamen Arabııa eline baryp qaıtqan bir azamatpen jaqsy tanyspyn. Sizge ótirik, maǵan shyn – sol azamat arab sheıhiniń atbasyndaı altyny men atshaptyrym baspanasynan, jelmen jarysqan kóliginen bas tartqan... Nege, nege... deısiz ǵoı?! Ol jaıly tolǵaýdy aldaǵy kún­derdiń úlesine qaldyra turaıyn... Talǵat SÚIINBAI, «Egemen Qazaqstan» Qyzylorda oblysy