Bul kúnderi pavlodarlyqtar osy óńirde týyp-ósip, eli úshin eleýli eńbek etken, aýyl sharýashylyǵy jáne ákimshilik salasynda basshylyq qyzmet atqaryp, artynda izgi iz qaldyrǵan Baqustar Ramazanovtyń 80 jyldyǵyn atap ótýde.
Baqustar Ǵabdulhaıuly osy óńirge aty málim Ramazanovtardyń otbasynda dúnıege keldi. Ramazanovtar degende eń aldymen eske, danyshpan Abaıdyń óleńderin birinshi bolyp oryssha aýdarǵan, qazaqtan shyqqan oqymystylardyń biri Nuq Ramazanov túsedi. Baqustardyń ákesi Ǵabdulhaı da bilimge erte talpynyp, ustazdyq qyzmet atqarǵan adam. О́z kezinde Shota-Aman Ýálıhanov, Kákimbek Salyqovqa orys tili men ádebıetinen dáris bergen. Al anasy Zeınel – qazaqtyń birtýar azamaty jazýshy Júsipbek Aımaýytovtyń qaryndasy.
Bul áýletten shyqqandardyń qaı-qaısysy bolmasyn osal bolǵan joq. Sonyń biri retinde Baqustar marqumnyń týǵan aǵasy Amanolla Ramazanovty ataýǵa bolady. Amanolla aǵanyń óz kezinde Shymkent, Semeı oblystarynda obkomnyń birinshi hatshysy qyzmetterin atqaryp, halyq sharýashylyǵyna laıyqty eńbek sińirgendigin halyq biledi.
Mine, osyndaı ortada týyp-ósken Baqustar Ramazanov ta atjalyn erte tartyp mindi. 1959 jyly Almaty aýyl sharýashylyǵy ınstıtýtyn bitirip, agronom mamandyǵyn alyp shyqqannan keıin Pavlodar oblysy, Kýıbyshev aýdany, Chkalov atyndaǵy keńsharǵa kelip, tyń ıgerýshiler dúrmegine qosylady. Kóp uzamaı bilimdiligi kózge túsken maman Oktıabrdiń 25 jyldyǵy atyndaǵy keńsharǵa dırektor bolyp taǵaıyndalady. Baqustar munda kelgen soń dırektorlyq qyzmetpen ǵana shektelmeı, ózi ıgergen seleksıoner, agronom mamandyǵyn odan ári damytyp, maldyń jem-shóp qoryn nyǵaıtý baǵytynda túrli zertteýler júrgizip, onysyn júzege asyra bastaıdy. Ertis alqabynda júgeri, kúnbaǵys, qytaı tarysy jáne basqa da daqyldardy egip, olardan joǵary ónim alyp, ǵalymdardyń kózine túsedi. Sóıtip, keńshar joǵaryda atalǵan tehnıkalyq daqyldardy ósiretin aýylsharýashylyq tájirıbe sharýashylyǵyna aınalady. Jas basshy ózi izdenisinen nátıje kórsetken soń, dırektorlyq qyzmetimen ǵylymdy qatar alyp júrip, 1977 jyly aýyl sharýashylyǵy ǵylymynyń kandıdattyq dıssertasııasyn qorǵaıdy.
– Sol tusta aýyl sharýashylyǵy salasynda qyzmet etken basqa basshy kadrlardan Baqustardyń bir ereksheligi onyń ǵylymǵa berilgendigi boldy. Ol ǵylymı negizge kóshirgen kezde ǵana sharýashylyqtan turaqty da tabysty ónim alýǵa bolatyndyǵyn erterek túsindi. Bul másele jóninen ǵalymdarmen kóp aqyldasyp, keńesti. О́z bilimin odan ári jetildire túsýdi jón kórdi. Sondyqtan sharýashylyqty basqara júrip, syrttaı aspırantýrada bilim alyp, óziniń atqaryp otyrǵan sharýashylyq qyzmetine qatysty ǵylymı taqyrybyn tańdady. Onyń ǵylym jolyndaǵy izdenisterine men jetekshilik jasaǵan edim. Baqustardyń ǵylym men sharýashylyqty qatar alyp júrýi aqyry úlken jemisin berdi. Ol ózi basqaryp otyrǵan keńshardy tájirıbe sharýashylyǵyna aınaldyryp, ǵylymı negizge kóshýge qol jetkizdi jáne osynyń nátıjesinde sharýashylyq egistikterinen mol ónim aldy, – deıdi Baqustardyń dosy Ulttyq ǵylym akademııasynyń akademıgi Zaırolla Dúısenbekov.
Osyndaı jetistikterdiń nátıjesinde Baqustar Ramazanov Ertis aýdandyq partııa komıtetiniń birinshi hatshysy qyzmetine taǵaıyndalady. Osy aýdanda júrgizgen jumystar nátıjesinde aýdan ortalyǵy Ertis aýyly qala mártebesine ıe bolady. 1979 jyly bul aýdan el qambasyna 22 mıllıon puttan astam astyq quıdy. Sóıtip, respýblıka kóleminde astyq qory eń mol úsh aýdannyń biri boldy. Osy eńbegi úshin Baqustar Ramazanovqa «Oktıabr revolıýsııasy» ordeni tapsyrylady.
Munan keıin Baqustar Ǵabdulhaıuly oblystyq agroónerkásip komıtetiniń tóraǵasy, 1990 jyly Pavlodar aýdandyq partııa komıtetiniń birinshi hatshysy qyzmetine saılandy. 1994 jyly 27 tamyzda 58 jasynda qaıtys bolady.
Baqustar Ramazanov «Qurmet Belgisi», Eńbek Qyzyl Tý, «Halyqtar dostyǵy» ordenderimen marapattalǵan. Qazaq KSR Joǵarǵy keńesiniń depýtaty bolyp saılanǵan.
Baqustar Ǵabdulhaıuly 1959 jyly, ıaǵnı óziniń ınstıtýt bitirer shaǵynda Kópeı Abdrahmanqyzymen kóńil jarastyryp, otaý kótergen bolatyn. Bul baqytty otbasynda bes bala dúnıege keldi. Bul kúnderi Baqustardyń urpaqtary ata-analarynyń eńbegi men tárbıesine saı ósip-jetilip, elimizge laıyqty eńbek sińirýde.
Baqustar Ramazanov osy shaǵyn maqalada atap kórsetkenimizdeı, óziniń ólsheýli ómirinde halyqqa adal qyzmet etýdiń aıshyqty úlgisin kórsetti. Pavlodarlyqtar ortasynan shyqqan azamattyń osy eńbegin árkez eske alyp otyrady.
Suńǵat ÁLIPBAI,
«Egemen Qazaqstan»