Brıtanııalyq Eddı Holl salmaǵy 500 kılo bolatyn shtangany kótergen dúnıejúzindegi alǵashqy adam atandy. «Jyrtqysh» degen laqap atymen belgili sportshy Anglııanyń Lıds qalasyndaǵy arenalardyń birinde rekord jańartqan. Bul ótken demalys kúnderi paýerlıftıngten ótken jarysta oryn aldy.
Sportshy úshin bul is ońaıǵa soqqan joq, onyń tipti, sol jerde qaıtys bolyp ketýi de múmkin eken. Jarty tonna shtangany beline deıin kótergennen soń, birden qysymy kóterilip ketipti.
– Kózim bulyńǵyrlanyp, basym aınalyp, esimnen tanyp qaldym. Kózimdi ashsam, murnymnan qan aǵyp ketken eken. Meniń bul erligimdi áli biraz ýaqytqa deıin eshkimniń qaıtalaı almaıtynyna senimdimin, – dedi 28 jastaǵy Eddı Holl.
Aıta keteıik, ol 2011-2015 jyldary «Ulybrıtanııadaǵy eń kúshti adam» týrnırinde jeńiske jetken. Sondaı-aq, osyǵan deıin atalmysh sport túrinen eki márte rekord jańartqan.
Aıan ÁBDÝÁLI,
«Egemen Qazaqstan»