«Jibek joly-2016» halyqaralyq avtorallıine qatysýshylar Qaraǵandy oblysyndaǵy Doskeı aýylynyń tusynan ótti.
Atalǵan avtorallı úsh memlekettiń – Reseı, Qazaqstan jáne Qytaı elderiniń aýmaǵyn basyp ótedi. Avtoshabandozdar 8-24 shilde aralyǵynda 10 735 shaqyrymdy quraıtyn jarys jolyn baǵyndyrýlary tıis. Mundaı alaman báıgede 30 eldiń namysyn qorǵaǵan 116 sporttyq ekıpaj baq synaýda.
Uıymdastyrýshylardyń aıtýynsha, «Jibek joly-2016» avtorallıiniń Qarqaraly jáne Aqtoǵaı aýdandarynyń jerin basyp ótetin joly 568 shaqyrymǵa teń. Bul – jarystyń qashyqtyq jaǵynan alǵandaǵy eń uzyn bóligi eken.
Avtorallıge qatysýshylardy Buqar jyraý aýdanyndaǵy Doskeı aýylynyń tusynda qarsy alýshylardyń arasynda oblys ákimi Nurmuhambet Ábdibekov te boldy.
«Jibek joly-2016» rallıinde baq synaǵan avtoshabandozdar ortasha alǵanda saǵatyna 200-250 shaqyrym jyldamdyqpen júredi eken. Bul kezeńniń kómbesi Balqash qalasynda oryn tepken. Osy jerde sharshap kelgen avtoshabandozdar az-kem aıaldaǵan soń, Almatyny betke alyp, jarys jolyna qaıta shyǵady.
Qaırat ÁBILDINOV