Búgin QR Qorǵanys mınıstrliginiń 91678 áskerı bóliminiń aýmaǵynda Jýaly aýdanyndaǵy qar kóshkininen qaza tapqan áskerı qyzmetshilermen qoshtasý rásimi ótti, dep habarlaıdy QazAqparat
Jambyl oblysy ákimdiginiń baspasóz qyzmeti habarlaǵandaı, qaza tapqan áskerılerdiń máıiti týystaryna jetkiziledi. Jerleý rásiminiń ýaqytyn otbasylardyń ózderi sheshedi.
Qaza bolǵan tórteýiniń Jambyl oblysy turǵyndary ekeni belgili. 24 jastaǵy kelisimshart qyzmetindegi qatardaǵy jaýynger – Tileýjan Keńesov, 22 jastaǵy qatardaǵy jaýynger – Maqsat Sháken, 26 jastaǵy efreıtor – Muhıt Turysmaǵanbetov Jýaly aýdanynyń, al 25 jasar kishi serjant Áýesbaı Erisbaev Taraz qalasynyń týmasy.
Aǵa leıtenant Álisher Moshabaev pen kishi serjant Maqsat Qydyrbaev almatylyqtar. Al 29 jastaǵy kishi serjant Ámir Aralbaev Ońtústik Qazaqstan oblysynyń turǵyny bolǵan.
Eske sala keteıik, Jambyl oblysyndaǵy Kóksaı shatqalynda ótip jatqan 91678 áskerı bólimi áskerı qyzmetshileriniń jaýyngerlik daıyndyǵy boıynsha josparly sabaǵy barysynda kútpegen jerden qar kóshkini oryn aldy. Qorǵanys mınıstri Sáken Jasuzaqov bastaǵan Úkimet komıssııasy juma kúni Jambyl oblysyna keldi. Komıssııa músheleri oqıǵa ornynda tótenshe jaǵdaıdyń sebebin anyqtap, qaza tapqandardyń otbasyna kómek kórsetý jumystaryn uıymdastyrýmen aınalysady. Qaza tapqan áskerılerdiń otbasylaryna ótemaqy beriledi. Áskerı qyzmet jáne áskerı qyzmetshilerdiń mártebesi týraly» Qazaqstan Respýblıkasy Zańynyń 51 babyna sáıkes, áskerı qyzmettik mindetterin oryndaý kezinde qaza bolǵan (qaıtys bolǵan) jaǵdaıda sońǵy qaıtys bolar (qaza bolar) kúni atqarǵan laýazymyna sáıkes 5 jyldyq aqshalaı úles kóleminde bir rettik ótemaqy tóleý qarastyrylǵan.