Parlament Senatynyń baspasóz qyzmeti habarlaǵanyndaı, juma kúni Qazaqstan Respýblıkasy Parlamenti Senaty Halyqaralyq qatynastar, qorǵanys jáne qaýipsizdik komıtetiniń tóraıymy Darıǵa Nazarbaeva Qazaqstan Qarýly Kúshteriniń Ulttyq áskerı-patrıottyq ortalyǵynda boldy.
Ortalyq memlekettik organdardyń, Qarýly Kúshterdiń, qalalyq áskerı-patrıottyq klýbtar men áskerı kafedralardyń, «Jas ulan» jáne «Jas qyran» balalar men jasóspirimder uıymdarynyń ókilderi, «Jas ulan» respýblıkalyq áskerı mektebiniń tárbıelenýshileri qatysqan kezdesýde patrıottyq tárbıe máseleleri keńinen talqylandy.
Qorǵanys mınıstri Sáken Jasuzaqov jyl saıyn «Aıbyn» jıyny, erlik sabaqtary, «Jiger» áskerı-patırottyq lagerlerin ótkizý sekildi sharalar kesheni júzege asyrylatynyn, sonymen qatar, jastardyń áskerı-patrıottyq tárbıesin taldaý barysynda osy jumystardy odan ári jetildirý jáne júıeleý qajettigin kórsetip otyrǵanynan habardar etti.
Qarýly Kúshter Bas shtaby bastyǵynyń orynbasary M.Talasov jetkilikti quqyqtyq jáne oqý-materıaldyq bazanyń bolmaýy, memlekettik organdar men qoǵamdyq birlestikterdiń shashyrańqylyǵy, sondaı-aq, jastardy tárbıeleýdegi ózekti máselelerdi ortaǵa saldy.
D.Nazarbaeva Memleket basshysy, Parlament jáne úkimettik emes uıymdardyń tarapynan patrıottyq tárbıege basa nazar aýdarylyp otyrǵanyn atap ótti.
Senator elimizdiń orta mektepterine kadet synyptaryn, oqý oryndaryna alǵashqy áskerı daıyndyq saǵattaryn qosymsha engizý jáne Qazaqstandaǵy áskerı-patrıottyq qozǵalysty damytý strategııasyn ázirleý qajettigin aıtty.
Sharaǵa senatorlar Muhtar Altynbaev, Georgıı Kım, Májilis depýtattary Zaǵıpa Balıeva, Baqytbek Smaǵul qatysty. Olar jas patıottardyń saýaldaryna jaýap berip, murajaı jádigerlerimen tanysty.