Almaty qalasynyń ákimi Baýyrjan Baıbek Almatynyń aýasy týraly jáne qala turǵyndarynyń áleýmettik jaǵdaıy týraly málimdedi, dep habarlaıdy QazAqparat.
«Almaty halqynyń sany 1,5 esege artýyna baılanysty jeńil kólik sany 10 esege ósti. Bul qala turǵyndarynyń qazirgi jaǵdaıynyń kórinisi. Barlyǵyna belgili, kólik qaladaǵy keptelisti arttyryp qana qoımaı, 80 paıyz tútin qaldyǵyn shyǵarady. Aýanyń lastaný deńgeıi joǵary, degenmen tómendeý úderisi de bar. «Qazgıdromet» málimetine súıensek, 4 jylda lastaný ındeksi 22 paıyzǵa azaıdy. Energetıkalyq nysandar shyǵaratyn tútin úlesi 2016 jyly 8 paıyzǵa azaıdy», - dedi ákim.
2016 jyly toksınder men paıdalanylǵan gaz tútini boıynsha baqylaý kúsheıtildi. Ekologııalyq talaptarǵa saı emes kólikterden 136 mln teńge óndirilgen. Ákim ekologııalyq talaptarǵa saı emes kólikterdiń 67 paıyzy ózge qaladan kelgen avtomobılderdiń úlesinde ekenin aıtty. Sonymen qatar, ákimniń aıtýynsha, ekologııalyq taza qoǵamdyq kólikterdiń úlesi 60 paıyzdy qurap otyr.
«Ekologııalyq kólik túrlerin endirip jatyrmyz. «Almaty Bike» jobasy aıasynda búginde 50 velobeket ashyldy. 2018 jyly onyń 5 ese kóbeıtemiz. Gazdandyrý da mańyzdy mindetimiz. Qalanyń 95 paıyzy gazdandyrylǵan. 2018 jyldyń aıaǵyna deıin tolyǵymen gazdandyrylady», - dedi Baýyrjan Baıbek.
Sonymen qatar, ol Elbasy tapsyrmasymen Ál-Farabı kóshesinen joǵary 12 metrden bıik 3 qabatty úı salýǵa tyıym salynǵanyn eske sala ketti.