2016 jyly 10,5 mln. sharshy metr turǵyn úı paıdalanýǵa berildi. Bul shamamen 90 myń turǵyndy qamtıdy. Bul týraly búgin QR Innovasııalar jáne damý mınıstrliginiń alqa májilisinde atalǵan vedomstvo basshysy Jeńis Qasymbek málimdedi.
Mınıstrdiń aıtýynsha, 2016 jyly qurylys salasyna quıylǵan ınvestısııa kólemi 830 mlrd. teńgeni qurady. Bul kórsetkish 2015 jyly 740 mlrd teńge bolǵan.
"Júrgizilgen reformalar nátıjesinde kásipkerler úshin qurylys júrgizýge ruqsat alý merzimi 3 aıdan 1 aıǵa deıin qysqardy. Atalǵan kórsetkishter boıynsha Qazaqstan Búkilálemdik Bank reıtıngisinde 152 orynnan 22 orynǵa kóterildi. "Nurly jer" turǵyn úı qurylysynyń biryńǵaı baǵdarlamasy ázirlenip, onyń aıasynda 1,5 mln. turǵyn úı salynatyn bolady. Al, 2017 jyly 100 myń turǵyn úı josparlanyp otyr", - dedi mınıstr.
Baǵdarlamanyń negizgi mindetteriniń biri turǵyn úı qurylysyn bıýdjetten tys tikeleı qarjylandyrýǵa aýystyrý.
"Negizgi basymdyq jeke qurylysshylardy yntalandyrý arqyly naryqtyq qatynasty jáne turǵyn úı qurylys jınaq banki júıesin damytýǵa berilmek. Sózimdi qoryta kele aıtarym, Memleket basshysy qoıǵan barlyq mindetter der kezinde jáne sapaly oryndalatyn bolady" - dedi Jeńis Qasymbek.