QR Prezıdenti Ákimshiliginiń tapsyrýymen Bas Prokýror jáne Astana qalasynyń ákimi «Elordadaǵy qaýipsizdik jáne jaılylyq» jobasyn iske asyrý boıynsha keshendi jospar bekitildi, dep jazady elorda ákimdiginiń resmı saıty.
Jobanyń maqsaty Astana qalasynyń turǵyndary men qonaqtary úshin, sonyń ishinde «EKSPO-2017» halyqaralyq kórmesin ótkizý kezinde qaýipsiz jáne jaıly jaǵdaılar jasaý bolyp tabylady.
Jobany iske asyrý barysynda 17 ortalyq memlekettik organnyń jáne kvazımemlekettik sektordyń qatysýy josparlanǵan, olar elordada qaýipsiz jáne jaıly ýaqyt ótkizýge baǵyttalǵan sharalar keshenin usynady. Sonymen birge, jobany ázirleýge elorda turǵyndary men shet memleketterdiń azamattary tartyldy, olar áleýmettik jelilerdegi onlaın saýalnama jáne tikeleı saýalnama arqyly qalanyń ómirine qatysty usynystary men pikirlerin bildirdi.
Jobany iske asyrý boıynsha keshendi jospar 2 baǵyttan turady: «Qaýipsizdik» jáne «Jaılylyq», bul ekeýi óz kezeginde 172 sharadan turatyn 6 basty baǵytqa bólingen.
«Qaýipsizdik» - bul baǵytqa qoǵamdyq jáne ekonomıkalyq qaýipsizdikti qamtamasyz etý máseleleri, tótenshe jaǵdaılardy boldyrmaý jáne olardyń saldaryn joıýǵa daıyndyq sharalary kiredi. Mysaly, jobany ázirleý barysynda Astanada 289 páter esepke alynǵany, sonyń 9,3 myńy nemese shamamen 4% zańdy túrde jalǵa beriletini anyqtaldy, alaıda sarapshylar shynaıy málimetterdiń resmı málimetterden alshaq ekenin aıtyp otyr. Elordada barlyq baspananyń 10% jalǵa beriledi, bul shamamen 400 mln teńge kóleńke aınalym, esepke alynbaǵan arendalyq páterlerdiń basqa jaǵy qylmyskerler úshin qolaıly orynǵa aınalatynynda.
Qalyptasqan máseleni sheshý úshin ishki ister organdarynyń, memlekettik kiris organdarynyń jáne turǵyn úı ınspeksııasy qyzmetkerleriniń qatysýymen «Ýchastok» jedel aldyn alý sharasy ótkiziledi. Olardyń basty mindeti mindetti salyq tóleýden jaltaryp júrgen páterdi zańsyz jalǵa berýshilerdi anyqtaý bolyp tabylady.
«Jaılylyq» baǵytyna servıske jáne ómir súrý sapasyna qanaǵattandyrý, týrıstik jaılylyqty qamtamasyz etý sharalary jatady. Keshendi jospardyń bul baǵytyn iske asyrý azamattardyń tólenetin jáne qaýipsiz eńbek etý quqyǵyn, múgedekterdiń jumysqa ornalasýyn, halyqtyń áleýmettik álsiz toptarynyń qorǵalýyn qamtamasyz etedi, medısınalyq qyzmet kórsetý deńgeıin, azamattardyń mádenı-rýhanı damýyn arttyrady.