Jaqynda Ekibastuzda qalalyq ákimdiktiń qoldaýymen, «Atamura» mádenıet ortalyǵynyń uıymdastyrýymen el Táýelsizdiginiń 25 jyldyǵyna arnalǵan «Táýelsizdik – táý eter jalǵyz kıem» atty halyqaralyq aqyndar aıtysy ótti. Aıtysqa jyrdyń jiligin shaǵyp, maıyn iship júrgen Qazaqstan, Qytaı, Mońǵolııa elderiniń 10 aqyny qatysty. Olar – Aspanbek Shuǵataev (Baıanaýyl), Dıdar Qamıev (Qaraǵandy), Nurmat Mansurov (Qyzylorda), Arzygúl Qaıynbekqyzy (Qytaı Halyq Respýblıkasy), Erlan Dáýlet (Mońǵolııa), Abzal Qabdrash (Pavlodar), Raýan Qaıdarov (Ekibastuz), Aıakóz Serikqyzy (Almaty), Nurqanat Qaırat (Astana), Qýanysh Sharmanov (Pavlodar).
El ishinde Pavlodar orystanǵan, aqyn túgili qazaq tabý qıyn degen qańqý sózderdiń bary belgili. Biraq bul jolǵy alaman aıtys sol sózdiń qısynsyz ekenin dáleldedi. Kelgen kórermenniń qarasy qalyń. Negizgi taqyryp Táýelsizdik bolsa da, aqyndar jaqynda jol apatynan qaza bolǵan, Ekibastuzdyń atyn shyǵaryp júrgen aqyn qyzy Almagúl Júginisovany da tilge tıek etpeı ótpedi. Nebári 34 jasynda kóz jumǵan Almagúldiń artynda óshpes óleńderi men aıshyqty aıtystary qaldy. Adamgershiligi bir tóbe aqynnyń sazgerlik qyry da elge endi tanys bola bastaǵan edi. Dese de, ajal aıtyp kelmeıdi, ómir qaıtyp kelmeıdi. Jazmyshtan ozmysh joǵyna eriksiz moıyn usynamyz.
Tórt saǵatqa sozylǵan dúbirli dodada aldyna qara salmaı, júıriktigin júıeli sózimen tanytqan Dıdar Qamıev bas júldeni ıelendi. Birinshi oryn Aspanbek Shuǵataevqa buıyrsa, ekinshi oryndy Raýan Qaıdarov enshiledi. Úshinshi oryn Mońǵolııadan kelgen qandasymyz Erlan Dáýletke buıyrdy.
Sonymen qatar, Júrsin Bátenuly atyndaǵy júldeni – Qýanysh Sharmanov, Almagúl Júginisova atyndaǵy júldeni – Arzygúl Qaıynbekqyzy, Túsiphan Qasymjanov atyndaǵy júldeni Nurmat Mansurov qanjyǵasyna baılady. «Arqaly aqyn» atalymyna – Nurqanat Qaırat, «Ozyq oıly, ótkir tildi» atalymyna – Aıakóz Serikqyzy, «Azýly aqyn» atalymyna Abzal Qabdrash laıyq dep tanyldy.
Barlyq aqyndarǵa alǵys hattar men aqshalaı syılyqtar tabys etildi.
Berik SADYR,
«Egemen Qazaqstan»