Áskerı-tarıhı murajaıda kópshilik nazaryna usynyldy
Qazaqstan Qarýly Kúshteriniń ulttyq áskerı-patrıottyq ortalyǵy Áskerı-tarıhı murajaıynda el Táýelsizdiginiń 25 jyldyǵyna jáne mýzeıdiń ashylǵanyna bir jyl tolýyna oraı «Uly dala: áskerı tarıh» atty ǵylymı-ádistemelik konferensııa ótti. Alqaly jıyn barysynda kópshilik Alashorda áskerlerine arnalǵan kórmeni, Berel qorymynan tabylǵan jádigerlerdi tamashalady. Sonymen qatar, Qyzylorda oblysy Aral aýdanynan jetkizilgen Aıdarbek batyrdyń saýyty men qylyshy tanystyryldy.
Ǵalymdardyń esebinshe, Aıdarbek О́risuly shamamen HVI-HVII ǵasyrlarda, Shyǵaı, Táýekel handardyń tusynda ómir súrgen. Jaýjúrek batyr derekterde onyń «Aqtaban shubyryndy, alqakól sulama» syndy surapyl zamandy kórgeni, jońǵarlarǵa qarsy shaıqastarǵa belsene qatysqandyǵy aıtylady. Sonymen qatar, seksen jasqa jetse de joryqtan qalmaǵan, kezekti urysta aýyr jaralanyp, kóz jumǵan. Batyr jerlengennen keıin saýyt-saımandary men jeke tutynǵan zattaryn urpaqtary yrymdap bólip alǵan kórinedi. Solardyń biri Táýelsiz Qazaq memleketi qurylǵan soń ǵana kópshilikke kórsetilýde.
Tórt ǵasyrdan astam ýaqyt urpaqtan-urpaqqa mıras bolyp kelgen qundy jádiger batyrdyń Aral qalasyndaǵy urpaǵy, zeınetker Jetkergen Nurqabylovtyń úıinde saqtalyp kelgen. Aqsaqal babasynyń saýytyn qarasha aıynda Astana qalasyndaǵy Áskerı-tarıhı murajaı qoryna tapsyrdy. Jetkergen Nurqabylovtyń aıtýynsha, taza bolattan jasalǵan tor kózdi saýyttyń salmaǵy on keliden asady. «Buryn bul saýyt budan da úlken bolǵan eken. Ýaqyt tezine shydamaı etek tusy qıylyp, eptep búlinse de mini qurymaı, búginge jetken jádiger el tarıhynyń bir bólshegi ekeni aqıqat. Tek zertteýshileri tabylyp, egjeı-tegjeıli saraptasa, jón bolar edi», deıdi batyrdyń urpaǵy.
Eske sala keteıik, byltyr toılanǵan Qazaq handyǵynyń 550 jyldyǵyna oraı Aıdarbek batyrdyń at ústindegi aıbyndy beınesinen eskertkish somdalǵan. Qolda bar derekterge súıenip tarıhı-tanymdyq kitap shyǵarylǵan.
Ashat RAIQUL,
«Egemen Qazaqstan»