Qazaqstan búginde bolashaqqa nyq senimmen qadam basyp kele jatqan el dep sanaıdy RF-daǵy Ázerbaıjan Respýblıkasynyń Tótenshe jáne ókiletti elshisi, keńes jáne ázerbaıjan estrada ánshisi, akter, kompozıtor, pedagog, ónertaný doktory, professor Polad Bıýlbıýl ogly. Bul týraly QazAqparat habarlaıdy.
«Qazaqstannyń jetistikteri óte kóp, ony bir suhbatta aıtyp jetkizý múmkin emes. Qazaqstannyń Keńes Odaǵynan shyǵyp, álemge bedeldi memleketke, kórnekti kóshbasshy Nursultan Nazarbaevtyń basshylyǵymen óz-ózin qamtamasyz etken, egemendi, táýelsiz elge qalaı aınalǵany meniń kóz aldymda ótti. Bul birtýar tulǵaǵa úlken rahmet aıtýymyz qajet, ol eń qıyn 90-shy jyldary óz halqyn, elin kóptegen synaqtardan aman alyp shyǵyp, búginde Qazaqstandy senimdi túrde alǵa jyljyǵan el qataryna qosty», – deıdi P.Bıýlbıýl ogly. Sondaı-aq, dıplomat el astanasynyń gúldenýin qazaqstandyq ǵajaıypqa balady.
«Sanaýly jyldardaǵy astananyń qaryshtap damyǵanyn qazaqstandyq ǵajaıyp der edim. Astanany aýystyrý úshin qatań saıası erik-jiger qajet. Bul qıyn da kúdeli úderis. Búginde Astana kórkine tamsanyp qaraıtyn qalaǵa aınaldy», – dedi ol. Sonymen qatar, ol QHA qyzmetiniń jáne el basshysynyń toleranttylyqqa basa nazar aýdarýymen qamtamasyz etilip kele jatqandyǵyn tilge tıek etti.
«Qazaqstanǵa barǵan kezde ázerbaıjan dıasporasymen jıi kezdesemin. Olar Qazaqstanda jaıly ómir súrip jatqandaryn aıtady. QHA - túrli ulttar men dinı senimdi biriktirýdiń óte tamasha tetigi. Halyq nazy tyńdalatynyn jaqsy biledi, sondyqtan da senimdi ári tatýlyqta ómir súrýde. Osy úshin Qazaqstan halqyna, onyń basshysyna alǵys bildirý qajet. Qazaqstan halqyn jáne asa qurmetti Prezıdentke el ıgiligi jolynda budan da úlken tabystar tileımin. Táýelsizdiktiń 25 jyldyǵymen quttyqtaımyn!», – dedi Polad Bıýlbıýl ogly.