Bıylǵy jyly álem boıynsha 7 myńnan astam mıgrant túrli jaǵdaılarda mert bolǵan. Arnaıy júrgizilgen zertteýler boıynsha bul rekordtyq deńgeıdegi kórsetkish bolyp otyr. Bul týraly Mıgrasııa jónindegi halyqaralyq uıym ókilderiniń esebinen belgili boldy, dep habarlaıdy QazAqparat.
Atalǵan ınternet-basylym taratqan derekter boıynsha, 2016 jyly kóship-qoný barysynda 7189 adam mert bolyp, birqatary iz-tússiz joǵalyp ketken. Bul rette 4812 adamnyń Jerorta teńizinde sýǵa ketip nemese joǵalyp ketkendigi belgili boldy. Zertteýshiler qurban bolǵan mıgrattar sanynyń artýy múmkindigin de joqqa shyǵarmaıdy. Jerorta teńizi arqyly Eýropa elderine barlyǵy bıylǵy jyly 357249 adam kelgen.
Kóship-qonýshylardy qabyldaý jaǵynan Gresııa kósh bastap otyr. Bul elge barlyǵy 170 myń bosqyn qonystanǵan.
Eýropa qazirgi tańda Ekinshi dúnıejúzilik soǵystan keıingi eń úlken mıgrasııalyq daǵdarysty bastan ótkerýde. Jaǵdaıdyń bulaısha qalyptasýyna Taıaý Shyǵys pen Soltústik Afrıka elderindegi qarýly qaqtyǵystar men ekonomıkalyq problemalar sebep bolyp otyr.
EO Frontex shekaralyq agenttiginiń málimetteri boıynsha, 2015 jyly eýroodaqqa 1,8 mln kóship-qonýshy kelgen.