Astanada «Ejelgi Mysyr eskertkishteri» atty halyqaralyq kórmeniń ashylý saltanaty ótti

Qazaqstan Respýblıkasynyń Mádenıet jáne sport vıse-mınıstri Aqtoty Raıymqulova alǵy sózinde qonaqtardy ıgi bastamamen quttyqtaı kele, Qazaqstan Respýblıkasynyń Mádenıet jáne sport mınıstri Arystanbek Muhamedıulynyń quttyqtaý sálemin jetkizdi. «Mysyr tarıhy – kóne tarıh. Kóne tarıhpen kómkerilgen kórmeniń ashylý saltanaty qutty bolsyn! Bul kórme Mysyr tarıhyn kezeń-kezeńimen tanystyratyn eksponattardan quralǵan. Mundaǵy tarıhı týyndylar ótken dáýirden mol maǵlumat beredi. Kórmedegi eksponattar ejelgi dáýir adamdarynyń tanym-túsinigin, mádenıetin, sol dáýirdegi qolóner sheberleri týraly mol málimet beredi. QR Ulttyq mýzeıinde osy aıda birneshe halyqaralyq kórmeler ótkizildi. Mundaı kórmeler halyqtyń tanym kókjıegin keńeıtýge septigin tıgizedi dep oılaımyn». Kórmege Týtanhamon toptamasy zattarynyń jartylaı asyl tastarmen áshekeılengen faraonnyń altyn jalatylǵan aǵash kúımesi, jartylaı asyl tastarmen áshekeılengen altyn jalatylǵan aǵash taǵy, syrtqy sarkofagy, sadaqalarymen qyz músini jáne jartylaı asyl tastarmen áshekeılengen altyn jaǵa qoıylǵan. Sonymen qatar, Mysyrdyń baı tarıhy dınastııalyqqa deıingi kezeńnen bastap orta ǵasyrǵa deıingi aralyqtaǵy ártúrli tarıhı kezeńderdiń buıymdary men jádigerleri kórinis tapqan. Mysyr Arab Respýblıkasynyń Týrızm mınıstrligi Halyqaralyq qatynastar boıynsha birinshi vıse-mınıstri Ahmet Shýkrı: «Bul kórme – Qazaqstan men Mysyr eliniń birlese otyryp jasaǵan úlken sharasy. Eki el arasyndaǵy dostyq qarym-qatynastyń nátıjesinde qos halyqtyń ózara syılastyǵy arta túsedi dep senemin. Bolashaqta halyqtar dostyǵy úlken tabysqa jetkizetini sózsiz. Búgingi kórme de osynyń nátıjesi», – dep óz pikirin bildirdi. Kórmede dınastııalyqqa deıingi kezeń Ejelgi Mysyrdaǵy ıeroglıf jazýynyń paıda bolýynyń úlgisi sanalatyn faraon Narmerdiń Paletkasymen tanystyrylady. Odan keıingi ejelgi patshalyq kezeń mysyrlyq keńse hatshysynyń músini, bederli sýretteri bar Hesır taqtaıshalary jáne Gor (Aspan) qudaıyn keıipteıtin qarshyǵanyń basy arqyly tanystyrylady. Orta patshalyq kezeńi onyń bıligi kezinde Mysyr shekarasy áldeqaıda keńeıgen 12 dınastııanyń ata-babasy sanalatyn Senýsert 1 faraonnyń boıalǵan aǵash músini arqyly kórsetiledi. Grek-rım kezeńi rımdik áıel basynyń músini arqyly, al kopt kezeńi osy kezeńge tán ıkon jazýmen jáne portrettik sýret óneri arqyly tanystyrylady. Ásem jazýlarmen bezendirilgen shyraǵdan jáne gúl órnekterimen bezendirilgen farfor tabaq jádigerleri Islam kezeńin kórsetedi. Kórmeniń ashylý saltanaty barysynda Mysyr folkloryn bıimen de, mýzykasymen de shetelderde tanystyryp júrgen «Reda» tuńǵysh halyq bıi ansambli óner kórsetti.