Depýtattardyń aımaqtarǵa issaparlarynda Qazaqstan Respýblıkasynyń aýmaǵynda turaqty turatyn sheteldik azamattar men azamattyǵy joqtar kepildendirilgen tegin medısınalyq kómek jáne qazir barynsha keń taralǵan onkologııalyq aýrý men qant dıabeti boıynsha beriletin tegin dáriler týraly kóp suraıdy.
Qazaqstan mıgranttar qabyldaý boıynsha Ortalyq Azııada mańyzdy oryn alatyn memleketterdiń biri. 2017 jyldyń 1 qarashasyndaǵy Ishki ister mınıstrliginiń málimetterine qaraǵanda, respýblıka aýmaǵynda 182312 sheteldik azamat jáne 6870 azamattyǵy joqtar turaqty ómir súrýde. Kórshiles memleketterdiń kóptegen azamattary bizde eshqandaı eńbek shartynsyz jumys istep, tegin áleýmettik paket jáne tegin medısınalyq qyzmetti ala almaı turyp jatyr. Bizdiń aıtpaǵymyz bul emes.
Bizdiń aıtpaǵymyz – Qazaqstan aýmaǵynda azamattyq almaı uzaq merzimde turyp jatqan jáne bizdiń eldiń kásiporyndarynda qyzmet istep, salyq tólep jatqandar men olardyń otbasy músheleriniń máselesi.
Qazaqstan Respýblıkasynyń zańnamasyna sáıkes mundaı azamattar tek tótenshe jaǵdaıda ǵana tegin medısınalyq kómek alady jáne qorshaǵan ortaǵa zııanyn tıgizetin aýrýǵa dýshar bolǵanda ǵana kepildendirilgen tegin kómek ala alady. Ondaı aýrýlardyń tizilimin ókiletti organdar jasaıdy. Munyń ózi tegin kómek tek juqpaly aýrýlarǵa ǵana jasalady degen sóz.
Jumys jasyndaǵy sheteldik azamattar aqyly medısınalyq kómekke qol jetkizgenimen, túrli sebeptermen azamattyq almaǵan qart adamdardyń mundaı múmkinshilikteri joq. Onkologııalyq aýrýmen jáne qant dıabetimen aýyratyn osyndaı adamdar hımııalyq preparattar men ınsýlınge qol jetkize almaı qınalýda.
Árıne Qazaqstanda bul problemany sheshýge talpynys jasaldy. Naqty aıtqanda 2017 jyldyń 30 maýsymynda tıisti zańnamaǵa ózgerister engizilip, 2018 jyldyń 1 qańtarynan bastap osyndaı azamattardyń tegin medısınalyq kómek alýy qarastyryldy. Alaıda osy zańǵa engizilgen sońǵy túzetýlermen tegin medısınalyq kómek alý merzimi 2018 jyldyń 1 qańtarynan 2020 jyldyń 1 qańtaryna shegerildi. Sóıtip jarymjan jandar taǵy eki jyl boıy eshqandaı kómek ala almaıtyn boldy. Osyǵan baılanysty Premer-Mınıstr B.Saǵyntaevqa mynadaı mazmundaǵy saýal joldadyq:
1.Joǵaryda atalǵan aýrýlarmen aýyratyn sheteldik jáne azamattyǵy joq naýqastar mindetti medısınalyq qamsyzdandyrý engizilgenshe tegin medısınalyq preparattarmen qamtamasyz etile me?
2. Al mindetti medısınalyq qamsyzdandyrý engizilgen soń atalǵan sanattaǵy azamattardyń tegin medısınalyq preparattarmen qamtamasyz etilýi qalaı júrgiziledi?
Narıne MIKAELIаN,
Májilis depýtaty