Qyzylorda oblysynda Áıteke bı kenti men Qazaly qalasy bir eldi meken bolyp qosylady. Oblys ákimi Qyrymbek Kósherbaevtyń qatysýymen Qazaly aýdanynda ótken kóshpeli májiliste osy másele talqylandy.
Aýdan ákimi Murat Ergeshbaev atqarylǵan jumystar men buǵan deıin de ótkizilgen basqosýlarda berilgen tapsyrmalardyń oryndalýy týraly baıandady.
Infraqurylymmen qamtamasyz etilip jatqan kenttegi 180 gektar aımaqtan Rámizder alańy men Demalys parkin salý úshin 8,2 gektar jer ýchaskesi belgilendi. Demalys parkine aýyz sý, elektr jelisi men joly salynyp, abattandyrý jumystary júrgizilse, jańa úlgidegi attraksıondar men oıyn alańdaryn salýǵa kásipkerlermen aldyn ala kelisim jasalǵan. Bul jańa úlgidegi saıabaq jergilikti halyqpen qatar, kórshiles Aral men Qarmaqshy aýdandarynyń turǵyndaryna da qyzmet kórsetetin bolady.
– Qazaqstan MJÁ ortalyǵy» AQ-men «Shaǵala» balalar tynyǵý lageriniń qurylysyn salýǵa kelisimge otyrdy. Búginde ınvestorlar izdestirilýde. Budan bólek, 250 oryndyq aýdandyq aýrýhana, 12 ekiqabatty úıler jáne ózge de áleýmettik nysandar qurylysynyń jobalary ázirlendi. Ulttyq qaýipsizdik komıteti aýdandyq bóliminiń keńse ǵımaraty men aýdandyq orman jáne janýarlar dúnıesin qorǵaý mekemesi keńsesiniń qurylysy jobasy daıyndalýda. Al bıyl aýdandyq mekemeler úıi men mádenıet úıi qurylysyna oblystyq bıýdjetten qarjy bólingen. Búginde oblystyq qurylys, sáýlet jáne qala qurylysy basqarmasymen memlekettik satyp alý joldary sheshilýde, – dedi aýdan əkimi.
Sonymen qatar, aýdannyń jańa ortalyǵynda Áıteke bıdiń eskertkishi ornatylmaq.
Baqtııar TAIJAN,
«Egemen Qazaqstan»
Qyzylorda oblysy