Astana qalasyndaǵy Ulttyq mýzeıde halyq aqyny, qazaq mádenıetiniń kórnekti ókili, kompozıtor Kenen Ázirbaevtyń týǵanyna 135 jyl tolýyna arnalǵan «Alataýdyń aqıyǵy» atty kórme uıymdastyryldy.
Kenen atamyz Jambyl oblysy Qordaı aýdanynyń Mátibulaq eldi mekeninde dúnıege kelgen. Ǵasyrǵa jýyq ǵumyr keshken abyz qarııanyń basqasyn aıtpaǵanda, 1916 jyly ult-azattyq qozǵalysqa qatysyp, ózi shyǵarǵan «Bulbul» áni, Uly Otan soǵysy jyldaryndaǵy jalyndy jyrlary sol zamannyń boıamasyz kórkem baıany ispettes. Qoǵam qaıratkeri, ǵalym Myrzataı Joldasbekovtiń aıtýynsha, Kenen atamyz qazaqtyń rýhanı qazyna qoryna 100-den astam án, óleń-jyr, epıkalyq dastan qosqan eken.
Mádenı sharany ashyp, kórme tamashalaýǵa kelgen qaýymǵa qutty bolsyn aıtqan Ulttyq mýzeı dırektorynyń orynbasary Abaı Satybaldın, búgingi kópshilik nazaryna usynylyp otyrǵan qundy jádigerler Qordaı aýdandyq K.Ázirbaev atyndaǵy ádebı-memorıaldyq mýzeı qorynan ákelingenin jáne Mádenıet jáne sport mınıstrligi men oblys ákimdigi bıyl aqynnyń shyǵarmashylyǵyn jan-jaqty nasıhattaý maqsatynda elimizdiń 9 qalasynda 13 is-shara josparlap otyrǵanyn jetkizdi.
Kórmeni tamashalaýǵa jınalǵan jurt sóreden Kenen atamyzdyń ómir jolyna qatysty fotosýretterdi, naqtyraq aıtsaq, ataqty jyrshy Nartaı Bekejanovpen birge túsken sýreti (1949 j), jazýshy Sábıt Muqanovpen qatar turǵan beınesi (1967 j), 75 jyldyq mereıtoıynda akademık Ahmet Jubanov aqynǵa dombyra syılap turǵan sáti, 90 jyldyq toıynda KSRO halyq ártisi Bıbigúl Tólegenovanyń quttyqtap kelýi, t.b. foto qujattardy tamashalady.
Sonymen qatar aqynnyń púlishten tigilgen mamyq jaǵaly jasyl shapany, ózi ustaǵan dombyrasy, 1974 jyly 14 maýsymda aqynǵa berilgen Lenın ordeni, tiri kúninde ózi tutynǵan buıymdar – kózáınek, qalamsap, qolsaǵat, kise beldik qatarly jádigerler de kórme tórinen oryn alypty. Jınalǵan jurtshylyq joǵarydaǵy jádigerlerdi tamashalaýmen qatar, mereıtoı qarsańynda túsirilgen «Alataýdyń aqıyǵy» atty derekti fılmdi kórip, kózaıym boldy.
Beken QAIRATULY,
«Egemen Qazaqstan»