– Elbasynyń «Bir qyzdy tárbıeleý – bir ultty tárbıeleýmen teń» degen sózin naqty is júzinde qoldana otyryp, elimizdegi joǵary oqý oryndaryndaǵy qyzdar uıymdarymen birlesip jumys isteý, ózara tájirıbe almasý basqosýdyń basty mindeti. Búgingi qyz – erteńgi ıbaly jar, sypaıy kelin, qamqor ana. Jalpy, qyz balasy – urpaq tárbıesi men sabaqtastyǵynyń myzǵymas uıytqysy. Osynaý jolda «Qyz Jibek» klýbynyń atqaratyn ózindik úlesi óte zor. «Qyz Jibek» klýby – aıaýly arýlarymyzdyń tárbıeli, parasatty, jan-jaqty bolyp ósýine yqpalyn tıgizip júrgen birden-bir klýb desem artyq aıtqanym emes. Aldaǵy ýaqytta da atalmysh klýb kóptegen ıgilikti isterge uıytqy bolady, – deıdi Qyzdar ýnıversıtetiniń tárbıe jáne áleýmettik máseleler jónindegi departamentiniń dırektory Jańagúl Sultanova.
Forým barysynda qoǵam qaıratkeri, Qyzdar ýnıversıtetiniń túlegi Asyly Osmanqyzy «Qyz tárbıesi – ult tárbıesi» taqyrybynda áńgime órbitti. Al Jalpy pedagogıka kafedrasynyń qaýymdastyrylǵan professory, pedagogıka ǵylymdarynyń kandıdaty Sarash Qońyrbaeva qazaq qyzynyń jańa ǵasyrdaǵy beınesi týraly baıandap, ýnıversıtettiń oqý úrdisine engizilgen «Qazaq arýy» páni týraly baıandady. Qazaq til biliminiń teorııasy men ádistemesi kafedrasynyń meńgerýshisi, fılologııa ǵylymdarynyń doktory Tynyshtyq Ermekova «Qyzym saǵan aıtam...» taqyrybyndaǵy beınedárister serııasyn tanystyrdy. Sondaı-aq jıynda Qyzdar ýnıversıtetiniń PHD doktoranty, «Qyz Jibek» klýbynyń burynǵy tóraıymy Marjan Aqtaeva uıymnyń tarıhyna sholý jasasa, klýbtyń belsendi múshesi Saltanat Serikqyzy onyń basty bes baǵytyn atap ótti.
Forýmda ál-Farabı atyndaǵy Qazaq ulttyq ýnıversıteti, L.N.Gýmılev atyndaǵy Eýrazııa ulttyq ýnıversıteti, Abaı atyndaǵy Qazaq ulttyq pedagogıkalyq ýnıversıteti, Qazaq ulttyq agrarlyq ýnıversıteti, S.Amanjolov atyndaǵy Shyǵys Qazaqstan memlekettik ýnıversıteti, H.Dosmuhamedov atyndaǵy Atyraý memlekettik ýnıversıteti, S.Toraıǵyrov atyndaǵy Pavlodar memlekettik ýnıversıteti jáne M.О́temisov atyndaǵy Batys Qazaqstan memlekettik ýnıversıteti qyzdar klýbtarynyń músheleri onlaın baılanysqa shyǵyp, ulttyq salt-dástúr, qyzdar tárbıesi tóńireginde atqaryp jatqan jumystarymen, qolǵa alǵan jobalarymen tanystyrdy.
Aınash ESALI,
«Egemen Qazaqstan»
ALMATY