Sonaý 1956 jyly Italııanyń Kortına-d'Ampesso qalasynda alaýy tutanǵan Olımpııa oıyndaryna Qazaqstannan alǵashqy bolyp qatysqan áıgili sportshy, KSRO men Qazaqstannyń san dúrkin chempıony ári rekordshysy Aleksandr Artemenkony eske túsirýge arnalǵan dúbirli dodada Almaty qalasy, Almaty men Shyǵys Qazaqstan oblystary jáne Qyrǵyzstan men Reseıden kelgen 100-den asa túrli jastaǵy taý shańǵyshylar baq synady.
Qazaqstannyń shańǵy sporty túrleriniń bas hatshysy Asqar Valıev: «Kóktemniń osyndaı keremet kezinde, «Shymbulaqtyń» tóbesinde kúnniń kúlimdep turǵan shaǵynda «Artemenko memorıalynyń» ótýi jaqsy bir dástúrge aınaldy. Osy dodaǵa jas ta, kári de qatysa alady. Sondyqtan da bizder úshin bul úlken sporttyq mereke», – dep aqtaryla sóıledi.
Jarystyń sońǵy kúni 2009-2010 jyldary týǵan uldar men qyzdardyń alpalyq kombınasııa saıysynda Dálel Tolqynova, Alena Ovsıannıkova, Naılıa Gaısa, Tımofeı Kostrov, Bogdan Ivanıhın jáne Sanat Aıtqazynov jeńis tuǵyryna kóterildi. 2011-2013 jyldary týǵandardyń tobynda Vıktorııa Ganja, Elızaveta Pasechnıkova, Adam Álıkeev, Bogdan Gvozdeskıı jáne Arsenıı Shaposhnıkov úzdikter qatarynan kórindi. 2007-2013 jyldary týǵan balalar arasynda Rostıslav Hohlov, Kırıll Mesherıakov jáne Alekseı Kýlakovtyń baǵy jandy.
Al «Artemenko memorıalynyń» jeńimpazy, KSRO sport sheberi, KSRO men Qazaqstannyń chempıony, KSRO Qarýly kúshteri birinshiliginiń júldegeri Vladımır Kýchın óz oıyn bylaı dep túıindedi: «Osy jarysqa qatysqan saıyn ózimniń búkil sporttyq ǵumyrym kóz aldyma elesteıdi. Erekshe bir saǵynysh paıda bolady. Men osyndaı básekeler barysynda búgingiden de kóp sportshylardy kórgim keledi. Kezinde Almatynyń ózinde ǵana SSKA, «Dınamo», «Qaırat», «Eńbek», «Lokomotıv», «Býrevestnık» klýbtary jemisti eńbek etti. Talǵarda shtattyq komanda jasaqtaldy. Aıtýly uıymdardyń qatarynda KSRO sport sheberleri, KSRO men respýblıka birinshiliginiń jeńimpazdary men júldegerleri boldy. Al Qazaqstan qurama komandasyna Aleksandra Ivanovna Artemenko jetekshilik etti. Sol kezderi KSRO-nyń kezeńdik saıystary qazanda Teriskólde bastalyp, kóktemde Kırovskide aıaqtalatyn. Bul básekeler barlyq myqty taý shańǵyshylarynyń basyn qosatyn. Sondaı-aq, Keńes Odaǵynyń jekelegen chempıonaty úzdiksiz uıymdastyrylyp turdy. Aıtýly dodada tek 30 úzdiktiń qataryna engen sportshylar ǵana qatysatyn. Negizi bizdiń sporttyq ómirimiz qyzyqqa toly bolatyn. Sondyqtan da taý shańǵysy meniń negizgi kásibime aınaldy. Al Aleksandar Artemenko barlyǵymyzdyń úlken ustazymyz».