Ataýy men formatyn birneshe márte ózgertken aıtýly doda 2002 jyldan beri úzdiksiz uıymdastyrylyp keledi. Alǵashqy jarystyń jalaýy Portýgalııanyń astanasy – Lıssabonda jelbiregen edi. Sol aralyqta ótken 17 jarystyń toǵyzynda ıspanııalyq komandalardyń mysy basym boldy. Tarqatyp aıtsaq, Alkala-de-Enares dep atalatyn shaǵyn ǵana shaharda jasaqtalǵan «Inter Movıstar» (burynǵy ataýy – «Býmerang Intervıý») klýby bes márte bas júldeni oljalady. Bul ataqqa olar 2004, 2006, 2009, 2017 jáne 2018 jyldary qol jetkizdi.
Kastelon-de-la-Plananyń «Plaıas de Kastelony» (2002, 2003) men Katalonııanyń «Barselonasy» (2012, 2014) eki retten top jardy. Almatynyń «Qaıraty» da dál sondaı kórsetkishke qol jetkizip otyr. Jerlesterimiz 2013 jáne 2015 jylǵy jarystarda jeńimpazy atandy. Sondaı-aq Belgııanyń «Akson 21» (2005), Portýgalııanyń «Benfıka» (2010), Italııanyń «Montezılvano» (2011) jáne reseılik «Dınamo Máskeý» (2007), «VIZ-Sınara» (2008), «Gazprom-Iýgra» (2016) fýtzalshylary bir-bir retten dara shyqty. Mine, osy sanaýly ǵana komandalardyń «Tórttik fınalynda» daralanýǵa shama-sharqysy jetti.
Aıtýly jarystyń sheshýshi saıystary Almatyda buǵan deıin eki márte uıymdastyrylǵan edi. 2011 jyly Balýan Sholaq atyndaǵy Sport saraıynda ótken básekede «Montezılvanonyń» mereıi ústem boldy. Apennın túbeginen kelgen túlekter fınalda «Sportıngti» 5:2 esebimen utty. Bul jarysty «Qaırat» qola medalmen qorytyndylady. Jartylaı fınalda «Sportıngten» 2:3 esebimen jeńilgen jerlesterimiz úshinshi oryn úshin tartysta «Benfıkadan» penaltı soǵý barysynda basym tústi – 5:3.Dúbirli dop dodasy araǵa alty jyl salyp, qaıta Alataý baýraıyna oraldy. Jańadan boı kóterip, zaman talabyna saı jabdyqtalǵan «Almaty Arenada» ótken jarysta «Qaıratqa» taǵy da qola júlde buıyrdy. Jartylaı fınalda «Inter Movıstarǵa» 2:3 esebimen ese jibergen qazaqstandyq komanda úshinshi oryn úshin aıqasta «Gazprom-Iýgrany» jeńdi. Bul básekeniń de taǵdyry penaltı soǵý arqyly sheshildi.
Mine, endi osy bedeli zor jarysty Almaty úshinshi márte qabyldaǵaly otyr. Aldaǵy kúnderi Alash topyraǵyna tabany tıgeli otyrǵan komandalardyń barlyǵy da óte azýly ekeni esh daý týǵyzbasa kerek. Qaı-qaısysynyń da bas júldeni oljalaýǵa múmkindigi bar.
Bıylǵy jarystyń jartylaı fınalda «Qaırat» pen «Barselona» kúsh synasady. Bul báseke 26 sáýirde saǵat 21.30-da «Almaty Arenada» ótedi. Kelesi oıyn dál sol jerde, sol kúni «Sportıng» pen «Inter Movıstar» arasynda órbıdi. Jartylaı fınalda jeńilgen komandalar 28 sáýirde qola medal úshin talassa, jeńgenderi aqtyq synda aıqasady.
Al osy ujymdardy jeke-jeke tanystyratyn bolsaq, olardyń qol jetkizgen tabystary tómendegideı: