Memleket basshysynyń kópbalaly jáne az qamtylǵan otbasylardy qoldaý sharalaryn kúsheıtý jónindegi tapsyrmasyn oryndaý maqsatynda qosymsha 2,5 mlrd teńge bólinip, negizsiz jobalardy qarjylandyrýdy ońtaılandyrý esebinen qalalyq «Baqytty otbasy» áleýmettik baǵdarlamasyn júzege asyrýǵa 3,1 mlrd teńge jumsalatyn bolady.
Naýryzbaı jáne Áýezov aýdandarynda qarttardy qoldaý boıynsha eki ortalyq, Medeý aýdanynda aýytqýshylyǵy bar múgedek balalar emdeletin kúndizgi bólim jáne Túrksib aýdanynda psıhonevrologııalyq syrqatqa ushyraǵan jandarǵa arnaıy áleýmettik qyzmet kórsetetin 360 oryndy Ortalyq ashýǵa qarjy bólindi.
Bilim berýde jańa nysandar salý esebinen qazirgi kezde mektepterde oryndardyń jetispeýshiligi 20%-ǵa, bala baqshalarda 14%-ǵa azaıdy. Degenmen, qala turǵyndarynyń sany jyl saıyn orta eseppen 50 myń adamǵa, oqýshylar sany 10-12 myńǵa, mektep jasyna deıingiler qatary 5-7 myńǵa ósýde. Nátıjesinde keıbir mektepterde oqýshylar sany artyp ketken. Mamyr-5,6 yqsham aýdandarynda 1200 oryndy eki mektep, Nurshashqan poselkesinde 600 oryndy mektep, Aqsaı-3a yqsham aýdanynda 225 oryndy, al Dýman-1 eldi mekeninde 850 oryndy qosalqy nysandar salýǵa respýblıkalyq bıýdjetten 3,3 mlrd teńge bólindi. Jas qanat, Alǵabas yqsham aýdandary men Bostandyq aýdanynda salynyp jatqan úsh bala baqsha qurylystaryn aıaqtaý úshin jergilikti bıýdjetten 212,6 mln teńge jumsalatyn bolady.
Búkilálemdik banktiń bıznesti jeńil júrgizý reıtıngi boıynsha Almaty elimiz boıynsha birinshi orynda tur, ShOB úlesi alǵash ret ekonomıkada 42%-ǵa jáne salyqta 64%-ǵa ósti. Sonymen qatar, el Prezıdenti Qasym-Jomart Toqaevtyń tapsyrmasyn oryndaý maqsatynda bıznes úshin nesıeniń mólsherin sýbsıdııalaýǵa bólinetin 4 mlrd teńgeden ózge Almatyda qosymsha taǵy da 1,9 mlrd teńge bólinedi. Jastar jyly aıasynda kásipkerlikti damytýǵa, joǵary bilikti jáne básekege qabiletti mamandar daıarlaýǵa arnalǵan «Jastar - el tiregi» áleýmettik jobasy qol alyndy. Almaty memlekettik kolledjiniń servısi men tehnologııasyn, kıim tigýdi konstrýksııalaý men onyń kórkemdik grafıkasyn jaqsartý, tigin sheberhanalaryn tolyq qaıta jabdyqtaý, keńselerdi kórkem modeldeý men shashtaraz ónerine baýlý, onyń ishinde ınklıýzıvti bilim berý úshin 100 mln teńge bólindi.