«Talaptyń oty aryndap» turǵan shaǵynda jastardyń bilimge bet alyp, tabysqa talpynýy qandaı jarasymdy. Mektep qabyrǵasynda júrip-aq ǵylymmen aınalysýǵa den qoıǵan jas zııatkerdiń tolaǵaı jetistikteri týraly biz buǵan deıin de estigenbiz. Qala ákiminiń qatysýymen dástúrli túrde ótetin úzdik túlekterdi marapattaý rásiminde Darınamen júzbe-júz jolyǵyp, arman-maqsattary týraly áńgimelestik. Onyń ınnovasııalyq tehnologııalarǵa qyzyǵýshylyǵy zor. Komandalas dostarymen birge aqyldy robot oılap tabýǵa alǵashqy talpynystaryn jasap ta úlgergen. Megapolıstegi halyqaralyq «Mıras» mektebiniń túlegi «IITU Robocon Games» respýblıkalyq baıqaýynda 2 oryn ıelense, ekologııa salasyndaǵy «Model UNESCO» saıysynda júzden júırik atanǵan. Matematıka pánin erekshe qulshynyp oqıtyn ol, bolashaqta Qazaqstannyń tehnıka, ekonomıka ǵylymdaryna óz jańalyǵymdy ákelsem degen armanymen bólisti.
«Álemde paıda bolyp jatqan sońǵy tehnologııalyq jetistikter, kóptegen mamandyqtardyń joıylýyna ákelýde. Úlken ujymnyń jasaıtyn jumysyn, bir ǵana kompıýter atqaryp otyr. Búginde tehnologııasy damyǵan elder eń baı memleketter. Biz de osy baǵytta jumys isteýimiz kerek. Meniń maqsatym – otandyq ǵylymǵa jańa lep ákelip, aqyldy robot oılap tabý. Múmkindigi shekteýli azamattarǵa arnalǵan bıonıkalyq býyndar, erekshe protezder qurastyrǵym keledi. Sebebi, mundaı quraldardy muqtaj jandar basqa elderden qymbat baǵaǵa satyp alýǵa májbúr. Olardy alýǵa kópshiliginiń qaltasy da kótere bermeıdi. Janym qalaıtyn kásibim arqyly adamdarǵa jaqsylyq jasasam deımin. Armandarym óte kóp. Ol úshin talmaı izdený, eńbektený qajet ekenin de jaqsy bilem. Kóptegen daryndy jastar shet memleketterge oqýǵa baryp, sol jaqta qalyp jatady. Menińshe, bul durys emes. Olar úırengen bilimderin, tájirıbelerin óz eliniń ıgiligine, damýyna jumsaýy kerek», – deıdi Darına Nurǵalıqyzy.
Oıy ushqyr jas talapkermen tildesip otyryp, onyń qazaq ekonomıka ǵylymyna aıtýly úles qosqan akademık Nurǵalı Mamyrovtyń qyzy ekenin bildik. Kenet, «qasqa aıǵyrdyń qulyny qasqa týmasa da tóbel týady» degen sóz eriksiz oıymyzǵa oraldy. Áke boıyndaǵy talant perzentine darypty. Bizde Darınaǵa jolyń bolsyn, jas talap degen tilegimizdi aıttyq.