Sh.Sarıev atyndaǵy Atyraý oblystyq kórkemsýret jáne qoldanbaly sándik óner mýzeıinde QR Sýretshiler birlestiginiń múshesi, belgili sýretshi Muratbek Jolamannyń «Rýhpen syrlasý» atty kórmesi ótti. Sharaǵa Qazaqstan jáne Qyrǵyzstan Respýblıkalarynyń eńbek sińirgen qaıratkeri, kompozıtor, sýretshi Ilııa Jaqanov, QR eńbek sińirgen qaıratkeri, memlekettik syılyqtyń ıegeri Aqushtap Baqtygereeva, QR Sýretshiler Odaǵynyń tóraǵasy О́mirbek Jubanııazov pen Muratbek Jolamannyń jubaıy Gúljámish Bákeıqyzy qatysty.
Mýzeı qabyrǵasynan oryn alǵan sýretshiniń kartınalarynan menmundalaǵan rýhty, jiger men qaısarlyqty ańǵarmaý múmkin emes.
- Otandyq beıneleý ónerinde ózindik iz qaldyrǵan Muratbek Taýfıquly negizinen tarıhı taqyryptarǵa basymdyq berdi. Qaı kartınasyna da úlken jaýapkershilikpen, daıyndyqpen barǵany baıqalady. Elbasynyń «Rýhanı jańǵyrý» baǵdarlamasy aıasynda osyndaı óner ıeleriniń shyǵarmashylyqtaryn nasıhattaý, estetıkalyq tárbıe berý – bizdiń jumysymyzdyń basty maqsaty, - deıdi mýzeı basshysy Tólegen Orynbasaruly.
Sýretshi Muratbek Jolaman 1966 jyly Batys Qazaqstan oblysynda dúnıege kelgen. T.Júrgenov atyndaǵy qazaq ulttyq óner akademııasyn bitirgen. 2000 jyly ómirden ozdy. Qazir sýretshiniń jumystary Anglııa, Polsha, Koreıa, Túrkııa elderindegi mýzeılerde saqtaýly. «Qulager», «Edil-Jaıyq», «Saryn», «Tumar», «Qorqyttyń teńizge kelýi», «Qyzǵysh qus», «Attılanyń elesi» sekildi basqa da kartınalary sýretshiniń bıik óresin, joǵary talǵamy men qalam qýatyn anyq ańǵartady. Atyraýlyqtar kórmeni bir aı boıy tamashalaı alady.