Qazirgi kúnderi adam balasyna kerekti dúnıeniń qatary sıregenimen, azyq-túlik pen dári-dármekke suranystyń eshqashan tolastamaıtyny tabıǵat zańdylyǵy. Sondyqtan da aldymen osy ekeýiniń baǵasyna baqylaý qajet bolyp tur. Máselen, qaladaǵy barlyq dárihana baǵalaryna kúndelikti monıtorıng júrgiziledi. Bul týraly qalalyq ákimdiktiń baspasóz ortalyǵynda ótken brıfıngte Almaty qalasy Taýarlar men qyzmetterdiń sapasy men qaýipsizdigin baqylaý departamentiniń basshysy Aızat Moldaǵasymova málimdedi.
– Almaty qalasy aýmaǵynda Tótenshe jaǵdaı men karantın kezinde dári-dármekterge qoljetkizý qalaı júrip jatqanyna toqtalmaqpyn. Buǵan deıin Taýarlar men qyzmetterdiń sapasy men qaýipsizdigin baqylaý departamenti men Qazaqstan Respýblıkasynyń farmasevtıkalyq qyzmetti qoldaý jáne damytý qaýymdastyǵynyń arasynda memorandýmǵa qol qoıylǵan bolatyn. Iаǵnı, bul memorandýmǵa tótenshe jaǵdaı men karantın kezinde eń qajet preparattar sanalatyn 103 dári-dármek jáne medısınalyq ónimder tizimi kirgen bolatyn. Biz medısınalyq preparattardyń sany men baǵasyna kúndelikti monıtorıng jasap otyrmyz, – dedi A.Moldaǵasymova.
Spıkerdiń aıtýynsha, dál osy medısınalyq ónimder tiziminiń baǵasyn ákimshilik ókilderi, joǵaryda atalǵan departament pen ózge de memlekettik mekemeler kúndelikti baqylap otyr.
Júrgizilgen monıtorıng aıasynda qaladaǵy barlyq 8 aýdan qamtylǵan. Búgingi kúni olar 135 dárihana uıymyna baqylaý jasap, 5 dárihanada baǵa kóterý deregin anyqtaǵan.
– 2019 jyldyń 1 maýsymynda QR Densaýlyq saqtaý mınıstri qol qoıǵan osy buıryqqa toqtala ketsek, joǵaryda atalǵan, satýǵa tyıym salynǵan dári-dármekterdiń barlyq derlik túrlerine shekti baǵa qarastyrylǵan. Jaýapkershilikke tartý úshin 5 dárihana sotqa jiberildi, – dedi spıker.
Aıta keteıik, zań buzǵany úshin 97 myńnan bastap 225 myń teńgege deıin aıyppuldar qarastyrylǵan.
Bas sanıtardyń málimdeýinshe, qalalyq shtab pen «Dolche Farm» óndirýshisiniń arasyndaǵy kelisimshart negizinde qaladaǵy 70 dárihanada turǵyndarǵa arnalǵan betperde jetkilikti túrde satylatyn boldy. Máselen, 9 sáýirde 164 myń betperde bolsa, búgin betperde sany 250 myńǵa jetip otyr. Úsh qabatty betperde úshin baǵa saıasaty 87 teńge bolsa, al kómir súzgisinen jasalǵan betperde 111 teńge jáne bir adamnyń qolyna 10 betperdeden artyq berilmeıdi.
Saýda jáne ıntegrasııa mınıstrligi men Ulttyq ekonomıka jáne Densaýlyq saqtaý mınıstrlikteri 7 sáýirde «Medısınalyq betperdelerdiń shekti baǵasyn bekitý týraly» buıryqqa qol qoıǵan bolatyn. Ol boıynsha bir medısınalyq betperde úshin bekitilgen baǵa 118 teńgeden aspaý kerek.