6 mamyrda brazılııalyq «TV-Supren» telearnasynda Qazaqstannyń elshisi Qaırat Sarjanov qazaqtyń aqyny, oıshyly jáne ulttyq ádebıettiń negizin qalaýshysy Abaı Qunanbaıulynyń 175 jyldyǵyn merekeleý aıasynda onyń alǵashqy ret portýgal tiline aýdarylǵan «Qara sózderi» kitabynyń tusaýkeserin ótkizdi. Bul týraly SIM baspasóz qyzmeti habarlady.
Is-shara barysynda Qaırat Sarjanov Qazaqstannyń Tuńǵysh Prezıdenti - Elbasy Nursultan Nazarbaevtyń ulttyq biregeılikti, ózindik ulttyq kodty saqtaý, mádenı jetistikterdi ilgeriletý, ásirese olardy shetelde nasıhattaý týraly bastamalaryn iske asyrýdyń mańyzdylyǵyn atap ótip, Abaı Qunanbaıulynyń qazaq mádenıetin damytýdaǵy rólin, boıynda tárbıe men ulttyq dúnıetanym máselelerin kóteretin, adamnyń kemshilikterin synaıtyn, adamdardy eńbek, aǵartýshylyq jáne ǵylymda joǵary jetistikterge jetýge, zańdardy saqtaýǵa shaqyratyn, halyq birliginiń mańyzdylyǵyn qozǵaıtyn «Qara sózderdiń» mańyzyna toqtaldy. Aqynnyń tulǵalyq qundylyǵy men onyń qazirgi qoǵam úshin mańyzdylyǵyna arnalǵan Memleket basshysy Qasym-Jomart Toqaevtyń «Abaı jáne HHI ǵasyrdaǵy Qazaqstan» atty maqalasyna da erekshe nazar aýdaryldy. Kitaptyń portýgal tilindegi basylymynyń tusaýkeseri Abaı Qunanbaıulynyń mereıtoıyn merekeleýdiń bastalýyna oraı qańtar aıynda Qazaqstan Respýblıkasy basshylyǵynyń qatysýymen Nur-Sultan qalasynda ótken saltanatty shara týraly beınebaıandarmen, qazaq aǵartýshysynyń ómiri men shyǵarmashylyǵy týraly beınerolıkter men tarıhı fotosýrettermen, qazirgi zamanǵy Qazaqstannyń peızajdary men kórinisterimen úılesimdi ótkizildi.
Ulttyq kongresstiń eks-senatory, Brazılııanyń burynǵy bilim mınıstri, professor Krıstovam Býarke Abaı shyǵarmasyna jasaǵan sholýy barysynda «sansyz aforızmderge toly, adam balasynyń erte jastan qalyptasýy tıis patrıotızm men erlik sekildi qasıetterin, mahabbat pen otan aldyndaǵy paryzyn, úlkenderge qurmetti madaqtaıtyn» aqyn eńbegine joǵary baǵa berdi. Ol «kitap basynan aıaǵyna deıin oqyrmandy ómirdiń máni týraly dana sózderdi jiberip almaıtyndaı etip, kernep otyrady" dep qorytyndylady. Avtor retinde uly aqyndardyń róli men sheberligi árqaısymyzdyń ishimizde tereń kómilgen oılardy oıata alatynynda ekenin eskersek, Abaı – álemniń eń uly aqyndarynyń biri.
«Qara sózder» jınaǵy portýgal tiline 2019 jyly Qazaqstannyń Tuńǵysh Prezıdenti-Elbasy Nursultan Nazarbaevtyń «Táýelsizdik dáýiri» kitabynyń aýdarmasymen jumys jasaǵan, fılologııa ǵylymdarynyń doktory, San-Paýlý ýnıversıtetiniń professory Edelsıo Amerıko tarapynan aýdarylyp, sanpaýlýlyq «Nova Aleksandrııa» baspasynda basylyp shyǵaryldy. Brazılııa jurtshylyǵyna qazaq aǵartýshysyn jaqynyraq tanýǵa múmkindik berý maqsatynda Abaı Qunanbaıulynyń týyndysy brazılııalyq oqý oryndary men kitaphanalaryna taratylady. Aýdarmanyń elektrondyq nusqasymen Qazaqstan Respýblıkasynyń Brazılııadaǵy Elshiliginiń saıtynda tanysyp, mátinin júktep alýǵa bolady.
Ulttyq kongresstiń eks-senatory, «Planetarlyq odaq» úkimettik emes uıymynyń jetekshisi, 2018 jylǵy qazanda Nur-Sultan qalasynda ótken Álemdik jáne dástúrli dinder basshylarynyń VI sezine qatysqan Ýlısıs Rıdel negizin qalaǵan «TV-Supren» telearnasy gýmanızm, yntymaqtastyq, áleýmettik ádilettilik qaǵıdalaryn nasıhattaıtyn, ǵylym men ınnovasııa, mádenıet pen óner, qorshaǵan ortany qorǵaý jáne t.b. salalardaǵy jetistikter týraly nasıhattaıtyn kontentti óndiredi.