Elorda ákimi Altaı Kólginov barlyq qalalyq jáne jeke klınıkalardyń bas dárigerlerimen, aýrýhanalardyń, taldaý ortalyqtarynyń basshylarymen jáne qalanyń bas sanıtarlyq dárigerimen onlaın-kezdesý ótkizdi. Bul týraly Nur-Sultan qalasy ákimdiginiń baspasóz qyzmetine silteme jasaı otyryp Egemen.kz habarlaıdy.
"Qazir kóptegen ótinishter kelip túsýde, sonyń ishinde iKomek ortalyǵy arqyly bizdiń turǵyndardan, úıde karantınde turǵan jáne aýrý belgileri bar adamdardan. Ár pasıentpen jeke jumys isteý kerek. Buǵan biz jasaǵan elektrondy karantındik qosymshanyń kómegi zor. Biraq birqatar shaǵymdar bar. Shaǵymdardyń kópshiligi № 6, 10 emhanaǵa jáne "Shıpager" otbasylyq densaýlyq ortalyǵyna kelip túsedi. Dárigerler Zoom arqyly koronavırýstyń asımptomatıkalyq tasymaldaýshylarymen onlaın-kezdesýler ótkizýi kerek: suraqtarǵa jaýap berip, olardyń densaýlyǵyn baqylap, pasıentterdiń ózin-ózi oqshaýlaý rejımin ustanýyn qamtamasyz etýi kerek. Naýqaspen keri baılanysy úshin basqa baılanys arnalaryn da qoldaný múmkindigi bar. Sımptomdar paıda bolǵan jaǵdaıda naýqas aýrýhanaǵa jatqyzylýy kerek. Vırýs eshqaıda ketken joq, sondyqtan qatań sanıtarlyq normalardy saqtaý kerek. Indettiń jańa tolqynyna daıyn bolýymyz kerek", – dedi elorda ákimi Altaı Kólginov.
Elordanyń medısınalyq mekemeleri qajetti dári-dármektermen tolyq qamtamasyz etilgen, barlyq aýrýhanalarda jeke qorǵanys quraldary, dezınfeksııalyq týnnelder, dárigerlik ambýlatorııalarda teplovızorlar ornatylǵan. Bul ǵımaratqa kirgen adamdardyń barlyǵynyń temperatýrasyn janasýsyz ólsheýge múmkindik beredi. Elorda ákimi Altaı Kólginovtiń ókimimen emhanalar men aýrýhanalar aýmaǵyndaǵy dezınfeksııalyq týnnelder men teplovızorlar sany artady.
Jalpy, Nur-Sultanda 2644 koronavırýs juqtyrý jaǵdaıy tirkeldi. 13 maýsymdaǵy jaǵdaı boıynsha 1893 naýqas (70%) emdelip shyqty. Aýrýhanalarda 700-den astam adam emdelýde, olardyń jartysynda pnevmonııa dıagnozy rastaldy. Koronavırýstyń naýqastarǵa zalaly túbegeıli joılyp ketpeıdi. Infeksııa tek ókpege ǵana áser etpeıdi – tindik fıbroz túrinde oshaqtar paıda bolady, sonymen qatar baýyrǵa, búırekke, júrekke jáne mıǵa áser etýi múmkin.
Qalalyq qoǵamdyq densaýlyq saqtaý basqarmasynyń basshysy Sáýle Qısyqova sanıtarlyq normalardy qatań saqtaý kerek ekenin atap ótti: "Mine, birneshe aı boıy medısına qyzmetkerleri qarqyndy rejımde jumys istep keledi. Azamattar tek ózderine ǵana emes, dárigerlerge de kómektesýi kerek. Nemquraılylyq densaýlyqqa zııan tıgizbeýi kerek. Sanıtarlyq normalardy saqtamaý qalalyq aýrýhanalardyń tolyp ketýine jáne bul dárigerler ár naýqasqa ýaqtyly kómek kórsete almaýyna ákelýi múmkin. Olardyń ishinde sizdiń jaqyndaryńyz da bolýy múmkin. Tipti deni saý jáne jas adamdar da qarsy tura almaıtyn asa qaýipti ınfeksııaǵa saqtyqpen qaraý kerek".