Elordada COVID-19 taralý qaýpin azaıtý maqsatynda birqatar qosymsha shekteý sharalary qabyldandy. Bul týraly qala ákimdiginiń baspasóz qyzmetine silteme jasaı otyryp Egemen.kz habarlaıdy.
Birinshi. Qalanyń sanıtarlyq dárigeri J.Pirálıevanyń sheshimimen 23 maýsymnan bastap barlyq memlekettik jáne jeke balabaqshalardyń jumysy toqtatyldy. Eger balalardyń qasynda qaldyratyn eshkim bolmasa, ata-analardyń biri qashyqtan jumys rejımine aýysýy kerek. Karantın kezeńinde balalardyń jalpy sanynyń tek 20%-y balabaqshalarǵa (memlekettik jáne jeke) bardy. Qabyldanǵan sharalar tek balalardyń densaýlyǵyn saqtaýǵa jáne ınfeksııanyń taralý qaýpin azaıtýǵa baǵyttalǵan.
Ekinshi. 23 maýsymnan bastap qalalyq emhanalarda ýaqytsha josparly taǵaıyndaýlar men naýqastardy qaraý ótkizilmeıdi. Mamandardyń josparly konsýltasııalyq kómegi qashyqtan jumys formatyna kóshirildi. Dıspanserlik esepte turǵan adamdarǵa dári-dármekterdi taǵaıyndaý qashyqtan jáne taratý úıge jetkizýmen júzege asyrylady. Halyqty vaksınasııalaý Ulttyq ekpe kúntizbesine sáıkes josparly túrde júrgiziletin bolady. Júkti áıelderdi qabyldaý jáne ýltradybystyq skrınıng ózgerissiz qalady. Qalanyń emhanalarynda tek jedel medısınalyq kómek jáne KVI belgileri bar naýqastar qabyldanady.
Úshinshi. HQKO-nyń jumys kestesi tańǵy 9-dan keshki 5-ke deıin qysqartyldy. Qalanyń sanıtarlyq dárigeri Janna Pirálıeva atap ótkendeı, turǵyndar adam kóp jınalatyn oryndarǵa barýdan bas tartyp, qatań sanıtarlyq normalardy saqtaý kerek: maska kıip, qashyqtyq saqtaý mańyzdy.
"Barlyq kásiporyndar jumysy toqtatylǵan "karantındik demalys" qajetti shara boldy. Barlyq saıabaqtar men alańdar jabyldy, qoǵamdyq kólikter toqtap, adamdar sebepsiz úıden shyqqan joq. Turǵyndar nemquraıdylyq tanytyp, ınfeksııanyń aýyrlyǵyn jete túsinbeıdi. Sanıtarlyq normalarǵa nemquraıdy qaraǵan jaǵdaıda biz "karantındik demalysty" taǵy da engizýge májbúr bolamyz. Barlyǵy maska kıip, áleýmettik qashyqtyq saqtaýy kerek", – dedi qalanyń sanıtarlyq dárigeri Janna Pirálıeva.