Elimizdiń Bas prokýratýrasy úlken halyqaralyq shý týdyrǵan Germanııadaǵy elshilik qyzmetkerlerine qatysty qylmystyq is qozǵady. Frankfýrttaǵy bas konsýl Ahat Alpysbaev pen onyń kómekshisi qazir tutqynda. Bul týraly «KTK» telearnasy habarlady.
Ekeýine iri kólemde kontrabandamen aınalysty degen aıyp taǵylǵan. Syrtqy ister mınıstri bul áreketti masqara dep baǵalap, sheteldegi barlyq qyzmetkerlerin jappaı tekserýge tapsyrma berdi. «О́kinishke oraı, aramyzdan osyndaı sumyraılar shyǵyp jatyr. Biraq bul kórgensizdik, mádenıetsizdik jaýapsyz qalmaıdy. Frankfýrttagy osy masqaradan keıin konsýldarga qatysty talapty kúsheıttik. Qazir sheteldegi barlyq konsýldyqtardy tekserip, tártipke keltirip jatyrmyz»,- dedi Syrtqy ister mınıstri Erlan Ydyrysov.
Germanııadaǵy bas konsýl Ahat Alpysbaev pen onyń kómekshisi Ádirov dıplomatııalyq poshtamen Germanııaǵa zańsyz jolmen iri kólemde temeki tasymaldaǵan. Qalta qamyn kúıttegender osy eldegi shylym baǵasynyń qymbattyǵyn ózderinshe paıdalanbaq bolsa kerek. Qazaqstandyq dıplomattardy birneshe aı boıy jasyryn ańdyǵan nemis kedenshileri kúdiktilerdi ustaý úshin arnaıy operasııa da uıymdastyrǵan. Endi dıplomattardy elimizge ekstradasııalaý úshin kelissózder júrgizilip jatyr. Bas konsýl men onyń kómekshisi tipti Germanııada sottalýy múmkin.
Danııar Túımebaı.