Syrshyl aqyn Saǵı Jıenbaev ótken ǵasyrda «Qarttarym, aman saý júrshi!» dep edi. Urpaq sabaqtastyǵynda qarttardyń ornyn keıingi tolqyn jalǵastyryp, onyń izin jastar basyp jatady. Bul buljymaı oryndalyp kele jatqan ómir zańy. Alapat soǵystyń maıdangerleri bul kúnde saýsaqpen sanarlyq qana qaldy.
Syrshyl aqyn Saǵı Jıenbaev ótken ǵasyrda «Qarttarym, aman saý júrshi!» dep edi. Urpaq sabaqtastyǵynda qarttardyń ornyn keıingi tolqyn jalǵastyryp, onyń izin jastar basyp jatady. Bul buljymaı oryndalyp kele jatqan ómir zańy. Alapat soǵystyń maıdangerleri bul kúnde saýsaqpen sanarlyq qana qaldy.Al olardyń jol sorabyn soǵys surapylynda balalyǵynan aıyrylǵan qaısar jandar basty. Kóńil kózi ashyqtar endi solardy elep-eskerip jatyr.
Altyn kúzben birge Arqa tósindegi Astanada elimizdiń oblystary barlarymen kózge uryp, jármeńke ótkizýdi dástúrge aınaldyrdy. Bul qazir ádemi jalǵasyn taýyp jatyr. Solarmen birge elordany kórýge nıet tanytqan, sol jaǵalaýdaǵy kóz tartar kórikti ǵımarattardy, aıbarly rýhanı dúnıelerge rıza keıippen qarap, teledıdardaǵy, sýretterdegi kórinister aqıqat eken dep júrgen aýyl qarttarymen dıdarlasyp qalǵanymyz bar.
– Biz Batys Qazaqstan oblysy, Jańaqala aýdanynan keldik. Ákimimiz Lavr Haıretdınov: «Astanany kórińizder, tamashalańyzdar. Sodan keıin elge kelip bar jaqsylyqty jetkizińizder», – dep ár aýyldan toǵyz qart alyp kelip edi, kórip kóńilimiz tolyp, osynyń bári táýelsizdiktiń arqasynda jetken jetistigimiz ekenine ılandyq. Elbasy Nursultan Nazarbaevtyń dara da dana isine kóńil toǵaıdy, – deıdi Qalımolda Zaınýllın. Ol aýyldyń da ajary ashylyp kele jatqanyna naqty mysaldar keltirdi. Al onymen qatarlas kele jatqan Seıdeǵalı Qoıshyǵalıev «Seksen úshke aıaq basqan shaqta Astanany kórý baqytyna ıe boldyq. Teledıdardan Batys elderiniń astanalaryn qaq jaryp aǵyp jatqan ózenderdi kórip, tańǵalýshy edik. Bizdiń astanamyz da Esildiń eki jaǵyna oryn teýipti. «Báıterek», «Han shatyr», Nazarbaevtyń ortalyq murajaıy kelisti-aq tur. Elden aqsaqaldar kelipti dep Senat, Májilis depýtattary qabyldap, qurmet kórsetti. Qartyn qadirlegen ata saltty kórip, bir marqaıyp qaldym», – deıdi. Taǵy bir aqsaqal: «Osyndaı ıgilikti iske uıytqy bolyp, bizdi qatardan qaldyrmaǵan ákim inimiz Lavr Rashıdulyna alǵysymyz eren. Seksenniń ústine shyǵyp selkildep júrgende, eńseli elordaǵa ákelip, osynsha izgi nıetke keneltti. Biz Astanadan kórgen árbir aqıqatty sýretke túsirip alyp júrmiz. Barǵan soń aýdan jurtshylyǵyna tanystyratyn bolamyz», – dese, Tabyldy Masatov el damýyna Jańaqala aýdany azamattarynyń qosyp otyrǵan úlesinen dáıekter keltirdi. Moldaǵalı Tájıev aýdanda atqarylǵan jumystardy alǵa tartty. «Ásirese, aýyl-aýylǵa jetken kógildir otyn men «Aqbulaq» baǵdarlamasy aıasynda taza sýǵa qolymyz jetti», – deıdi ol.
Kóneniń kózindeı, ómirdiń ózindeı qarttarmen dıdarlasqanda altyn tamyr aýylmen qaýyshqandaı boldyq.
Súleımen MÁMET,
«Egemen Qazaqstan».