Qostanaı oblysy Tobyl óńirindegi Kóbek eldi mekeniniń oqýshylary avtobýstyń jaramsyzdyǵynan eki aptadan beri sabaqqa barmaǵan. Aýyl turǵyndary balalarymyzǵa jóndi avtobýs bólmese, olardy múlde sabaqqa jibermeımiz deıdi. Bul týraly «Astana» telearnasy habarlady.
Shákirtterdi mektepke aparatyn eski kóliktiń tóbesi shuryq tesik eken. Jańbyr jaýsa, edenine sý tamshylaı jóneledi jáne onyń terezesi de jabylmaıdy. Al kúnniń sýyǵynda ishin jylytatyn peshi de joq. «Keıbir oqýshylar avtobýsta basyn soǵyp alyp jatady. Avtobýs óte sýyq. Otyratyn oryndyqtary da tesik»,-deıdi oqýshy Valentına Petrakova.
Bul aýylda bastaýysh mektep bar kórinedi. Al 5 jáne 10 synyptyń 18 oqýshysy kórshiles Prıozernyı orta mektebine qatynap oqıdy. 12 shaqyrymdyq jerge jetkenshe ábden yǵyrymyz shyǵady, keıde sabaqtan keshigip qalamyz deıdi olar. Joldyń sapasy da syn kótermeıdi. «Astyq jınaý naýqany bitken soń, oqýshylardyń kólik máselesi sheshiledi. Ol úshin seriktestik basshylarymen kelissóz júrgizýdemiz»,-deıdi Y. Altynsarın aýdany ákiminiń orynbasary Sábıt Qazybaev.
Baqytbek Keneshuly.