Mektepter áli de bolsa qashyqtan oqytýǵa daıyn emes. Árbir segizinshi oqýshyǵa ınternet jelisi qoljetimsiz. Osyndaı pikirlerdi alǵa tarqan ata-analar qaýymdastyǵy men keı depýtat ókili narazylyqtaryn bildirip otyr. Bul týraly Habar 24-ke silteme jasaı otyryp Egemen.kz habarlaıdy.
Irkınchaevtar áýleti elorda mańyndaǵy aýyldardyń birinde turady. Otbasynda 9 bala bar. Jartysy mektep pen kolledjde bilim alady. Balalary ınternetpen sabaq daıyndaý úshin úıdiń shatyryna shyǵyp oqıdy eken. Tek osy jerde ǵana ǵalamtor jelisi birqalypty ustaıdy. Sabaq oqýdaǵy tildesýdiń basty quraly osy uıaly telefon.
Kópbalaly ana Tájigúl Irkınchaeva: "Áleýmettik qyzmetkerler kompıýtermen qamtamasyz etý boıynsha kómektesemiz dedi. Alaıda, tehnıka qolymyzda joq. Jýyrda ákimdikke baryp aryz jazdyq. Olar bizdi mektepke qajet qural-saımandarmen ǵana shyǵaryp saldy. Al kompıýter máselesi belgisiz jaǵdaıda qala bermek", deıdi ata-ana.
Nursultan qalasynyń ata-analar qaýymdastyǵynyń ókili Tatıana Korshýnovanyń aıtýynsha, pandemııa jaǵdaıynda kóptegen otbasy tabyssyz qaldy. Eger tabysy qolynda bolsa, olar kompıýter satyp alar edi. Keıbir ata-analar úılerinde qashyqtan isteıtindikten, balalaryna ýaqyt bólýden bólek, kompıýterde jumys isteý tapshylyǵy da arta túsetinin qosa ketti.
"Tehnıkalyq turǵydan qashyqtyqtan oqytýǵa biz daıyn emespiz jáne úsh aı ishinde qamtamasyz etý máselesin sheshýge bolatyn edi. Biraq depýtattar jaz óte qysqa merzim dep sanaıdy. Ata-analar men saıasatkerler de bir oıda, qazir kompıýter oqýlyq nemese qalam sııaqty qajet", deıdi áleýmettik qyzmet ókili.
Al Parlament Májilisiniń depýtaty Irına Smırnova: "Bizdiń Konstıtýsııada orta bilim tegin dep jazylǵan. Demek, tegin bilim alý úshin ony barlyq oqý quraldarymen qamtamasyz etý kerek. Eger qazirgi ýaqytta kompıýter oqý quralyna aınalsa, onda barlyq stýdentterdi kompıýterlermen jabdyqtaýymyz qajet. Esterińizge sala keteıik, oqýshylardyń 80%-y ınternet-sabaqtardy kompıýtermen nemese teledıdar arqyly qashyqtyqtan oqýdy josparlap otyr. Osy jaǵdaıda ár óńirdiń ákimdikteri balalardy tehnıkamen tolyqtyryp otyrýyn qadaǵalaýy tıis. Eń nashar ahýal Batys Qazaqstan, Jambyl oblystarynda jáne Almaty qalasynda tirkelgen. Bul aımaqtarda stýdentterdiń jartysynan jýyǵynda kompıýter joq", deıdi depýtat.
Qazaqstandaǵy jáne álemdegi sońǵy jańalyqtardy birinshi bolyp oqý úshin Telegram jelisinde bizge jazylyńyz.