Keshe, 2 qazanda Sybaılas jemqorlyqqa qarsy is-qımyl agenttigi men Densaýlyq saqtaý mınıstrligi densaýlyq saqtaý salasynda sybaılas jemqorlyqqa qarsy is-qımyl máseleleri boıynsha keńes ótkizdi, dep habarlaıdy Egemen.kz
Keńeste Agenttik pen Mınıstrlik Áleýmettik medısınalyq saqtandyrý qorynda jemqorlyq táýekelderine syrtqy taldaý júrgizý týraly birlesken buıryqqa qol qoıdy.
Sybaılas jemqorlyqqa qarsy qyzmet Densaýlyq saqtaý mınıstrliginiń ortalyq apparatynda da osyndaı taldaý júrgizýdi josparlap otyr. Azamattyq qoǵamdy taldaý júrgizýge keńinen tartý mańyzdy. Spıkerler densaýlyq saqtaý salasyndaǵy qoǵamdyq baqylaýdy damytý qajettiligine erekshe nazar aýdardy.
Sońǵy 15 jylda densaýlyq saqtaýdy qarjylandyrý kepildendirilgen tegin medısınalyq kómek pen medısınalyq saqtandyrý kólemin qamtamasyz etýdiń ósýin eskere otyryp, 8 esege ulǵaıdy (2005 jyly – 191,4 mlrd teńge, 2020 jyly – 1,6 trln teńge).
COVID-19-ǵa qarsy kúres boıynsha epıdemııaǵa qarsy sharalarǵa qosymsha 300 mlrd teńgeden astam qarajat úılestirildi, onyń úshten birinen astamy Densaýlyq saqtaý mınıstrligi arqyly bólindi. Shamamen 60 mlrd teńge karantındik is-sharalarǵa tartylǵan densaýlyq saqtaý qyzmetkerleriniń ústemaqysyna jáne olardy qosymsha yntalandyrýǵa baǵyttalǵan.
"Bul qarajatty jymqyrý nemese maqsatsyz jumsaýdyń aldyn alý mańyzdy. Bólingen ár teńge maqsatty jerine medısınalyq qyzmetter, jeke qorǵaý quraldary, dárigerlerge ústemaqy túrinde jetýi tıis. Dárigerler óz densaýlyǵyn pıda etip, pandemııa kezinde halyqqa kúrestiń aldyńǵy shebinde kómek kórsetti. Bul úshin olarǵa Agenttik atynan erekshe alǵys bildirgim keledi. Ekinshi jaǵynan, jaǵymdy kúsh-jigerdiń áseri jemqorlyqty joıady. О́kinishke qaraı, bul qubylys mınıstrlik pen onyń vedomstvolyq baǵynysty uıymdaryn, sondaı-aq jergilikti densaýlyq saqtaý basqarmalaryn aınalyp ótpedi", dedi Agenttik tóraǵasy Alık Shpekbaev.
Sonymen qatar "Antıkor" Densaýlyq saqtaý mınıstrliginiń Qoǵamdyq keńesine saraptamalyq qoǵamdastyqtyń quzyretti ókilderiniń syndarly qatysý múmkindikterin keńeıte otyryp, "jańa tynys berý" qajettigin de atap ótti.
Otyrys sońynda 2015-2025 jyldarǵa arnalǵan sybaılas jemqorlyqqa qarsy strategııany, sondaı-aq Agenttik pen mınıstrlik arasyndaǵy sybaılas jemqorlyq quqyq buzýshylyqtardyń aldyn alý máseleleri boıynsha yntymaqtastyq týraly Memorandýmdy oryndaý aıasynda bıyl "Adaldyq alańy" jobalyq keńsesiniń jumysy uıymdastyrylyp, Jarǵysy bekitildi.