Aqtóbede búldirshinderge jasap otyrǵan jaǵdaıy jantúrshiktiretin jekemenshik bala baqshasy tabyldy. Bir aıtarlyǵy, atalmysh baqshasymaq budan eki aı buryn sottyń sheshimimen jabylǵan eken.
Aqtóbede búldirshinderge jasap otyrǵan jaǵdaıy jantúrshiktiretin jekemenshik bala baqshasy tabyldy. Bir aıtarlyǵy, atalmysh baqshasymaq budan eki aı buryn sottyń sheshimimen jabylǵan eken.
Biraq onyń aqshaǵa qunyqqan ıeleri tóbedeı sottyń tóreligine qulaq aspaı, jumysyn jasyryn túrde jalǵastyra bergen. Bálkim, ashyqtan-ashyq jumys jasaǵan da shyǵar. Sebebi, munda jurt balalaryn jerdiń astymen jetelep nemese tún qarańǵysyn jamylyp jetkizbeıdi ǵoı.
Al bul jolǵy dúrligis osynda astyrtyn uıymnyń músheleri sııaqtanyp kelip júrgen balaqaılardyń bastary bıttep ketkeninen keıin kóterilgen. Budan shoshynǵan ata-ana birden «sos» dabylyn qaǵyp, sanıtarlyq-epıdemıologııa qyzmetkerlerin shaqyrǵan. Alaıda, búldirshinderdiń qalaı bıttep júrgenin ázirge eshkim túsindirip bere alar emes.
Sanıtar mamandar balabaqshanyń jasyryn jumys istep jatqanyn oblystyq aýrýhanadaǵy áriptesterinen estipti. Sebebi, emdeý mekemesine sol balabaqshaǵa baryp júrgen bir búldirshin juqpaly dertpen túsipti. Dereý tekserýge kirisken olar bıtten ózge, balalarǵa beriletin tamaqtan da qaýipti taıaqsha tapqan.
«Bul balabaqshanyń taǵamdarynan adam aǵzasyna qaýipti stafılakokk taıaqshasy tabylǵannan keıin isi sotqa jiberilip, osyǵan baılanysty onyń jumysyn toqtatý týraly sheshim shyqqan», – deıdi oblystyq sanıtarlyq-epıdemıologııalyq qadaǵalaý departamentiniń bas mamany Gúlshat Qurbanǵalıeva.
Jalpy, bir jyldyń ishinde Aqtóbe qalasynda osylaısha jasyryn jumys jasap jatqan 22 balabaqsha anyqtalǵan. Olardyń ekpinin basýǵa qalanyń mektepke deıingi mekemeleri qaýqarsyz. Basty qıyndyq, qazir balabaqsha ashý úshin lısenzııanyń talap etilmeýi. Demek, bul tarapta árkim oıyna kelgenin isteı alady degen sóz. Sondyqtan sheneýnikter zańǵa ózgeris engizý kerektigin aıtyp otyr.
Murat AITQOJA.