Zańǵar jazýshy Ábish Kekilbaevtiń «Shyńyraý» povesiniń jelisimen túsirilgen kórkem fılm Bolgarııa astanasy Sofııa qalasynda ótip jatqan 13-shi halyqaralyq kınofestıvaline qatysýda. Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ túsirgen kınotýyndy qatarynan tórt jyl boıy halyqaralyq kınofestıvalderde top jaryp keledi.
Kartına qudyq qazýshy Eńseptiń oqıǵasyn baıandaı otyryp, menmendik, baqtalastyq, mahabbat, dostyq, qastandyq syndy shym-shytyryq dúnıelerdi arqaý etedi.
«Bul árıne, qazaq prozasynyń shoqtyǵy bıik týyndysy sanalatyn Á.Kekilbaevtiń «Shyńyraý» povesindegi eshkimdi jaıbaraqat qaldyrmaıtyn ǵalamat ıdeıasyn kórkemdep ekranǵa shyǵarý úshin ter tókken túsirý tobynyń jemisti eńbeginiń arqasynda júzege asyp otyrǵan jetistik dep oılaımyn», deıdi fılm rejısseri Jańabek Jetirýov.
Fılmniń túsirilim jumystary Mańǵystaý óńirinde ótti. Kartınada basty rólderdi Asylhan Tólepov, Aldabek Shalbaev jáne Aıjan Jetirý somdaǵan.
2009 jyly negizi qalanǵan Balqan aımaǵyndaǵy eń iri baıqaýlardyń biri – Sofia MENAR Film Festival kınofestıvali jyl saıyn óz kórermenderine kınogerler shyǵarmashylyǵynda beınelengen ıslam áleminiń mádenıeti jáne dástúrimen tanystyryp otyrady. Festıval sheńberinde Taıaý Shyǵys, Ortalyq Azııa ján Soltústik Afrıka memleketteriniń eń úzdik kórkem, derekti jáne qysqametrajdy týyndylary kórsetiledi. Aıta ketsek, bıylǵy festıvaldiń konkýrstyq baǵdarlamasynda usynylǵan 13 fılmniń ishinde Ázız Zaıyrov jáne Muhamed Mamyrbekov túsirgen «Qyz ben teńiz» fılmi de bar.