Memlekettik organdardyń, jergilikti ózin-ózi basqarý organdarynyń ózderine zańnamada júktelgen fýnksııalardan tys kásipkerlik qyzmetpen aınalysqany ne belgilengen qarjylandyrý kózderinen basqa materıaldyq ıgilikter men artyqshylyqtar qabyldaǵany úshin olarǵa aıyppul salynatyn bolady. Bul týraly OKQ brıfınginde Sybaılas jemqorlyqqa qarsy is-qımyl agenttigi tóraǵasynyń birinshi orynbasary O.Bektenov aıtty, dep habarlaıdy Egemen.kz.
«Mundaı zańsyz is-áreketter úshin osy uıymdardyń basshylaryna 600 aılyq eseptik kórsetkish nemese 1,8 mln teńge kóleminde aıyppul salý kózdelgen», dedi ol.
Sondaı-aq, zańdy tulǵalar ÁQBtK aıasynda laýazymdy tulǵalarǵa materıaldyq syıaqyny zańsyz bergeni úshin sybaılas jemqorlyq boıynsha jazalanýy múmkin. Bul rette aıyppul somasy 700-den 1500 AEK-ke deıin túrlenedi.
Ol sybaılas jemqorlyq úshin zańdy tulǵalardyń jaýapkershiligi bazalyq halyqaralyq standart bolyp tabylatynyn atap ótti. Sondyqtan osy baǵyttaǵy jumys nátıjeleri Qazaqstandy EYDU jáne GREKO sarapshylarynyń baǵalaýy aıasynda óte mańyzdy bolmaq.
Onyń aıtýynsha, bıyl kúzde sybaılas jemqorlyqqa qarsy is-qımyldyń qazaqstandyq júıesiniń joǵary eýropalyq standarttarǵa sáıkestigin baǵalaý maqsatynda Eýropa Keńesiniń sybaılas jemqorlyqqa qarsy memleketter toby (GREKO) sarapshylarynyń elimizge alǵashqy sapary josparlanǵan.