Germanııa týrısterdiń elge kirýine engizilgen shekteýlerdi jeńildetti. Endi COVID-19 juqtyryp, aýrýdan jazylǵan jáne oǵan qarsy vaksına saldyrǵan týrıster shekaradan ótken kezde PTR-testinen jáne karantınnen bosatylady, dep habarlaıdy Egemen.kz.
13 mamyrdan bastap Germanııa úkimeti koronavırýs ınfeksııacyn juqtyryp, aýrýdan jazylǵan nemese ınfeksııaǵa qarsy vaksına saldyrǵan týrısterge elge kirgen kezde PTR-test tapsyrmaýǵa, sondaı-aq eki aptalyq oqshaýlaýdy saqtamaýǵa múmkindik beredi.
El bıligi eýropalyq retteýshi mekeme maquldaǵan - BioNTech / Pfizer, Moderna, AstraZeneca jáne Johnson & Johnson vaksınalaryn moıyndaıdy. Reseılik jáne qazaqstandyq preparattar bul sanatqa kirmeıdi.
Sondaı-aq 48 saǵatqa deıin antıdeneler synaǵyn tapsyrǵan nemese 72 saǵatqa deıin PTR-testi bar týrıster karantınnen bosatylady. Tek qolaısyz epıdemıologııalyq jaǵdaıy bar elderden kelgen saıahatshylar oqshaýlanýy qajet.