Qazaqstan fýtbol federasııasynyń Prezıdenti Ádilbek Jaqsybekov qoldanystaǵy Qazaqstan fýtbolyn damytý strategııasyn jańartý týraly bastama kóterdi, dep habarlaıdy Egemen.kz QFF baspasóz qyzmeti taratqan aqparatqa silteme jasap.
Baǵdarlamany daıyndaý úshin fýtbol medıa-ındýstrııasy, zertteý jáne strategııa salasyndaǵy sarapshylar tobynyń kóshbasshysy sanalatyn Result Sports kompanııasynyń bas dırektory Marıo Leo shaqyryldy.
Marıo Leo dúnıe júzi boıynsha 60-tan astam fýtbol klýbtary men ulttyq qaýymdastyqtarǵa keńes beredi. Olardyń arasynda «Borýssııa Dortmýnd», «Barselona», «Iýventýs» klýbtarynyń jáne Eýropa elderiniń fýtboldy damytý týraly 14 strategııasyn jazyp shyqqan.
Strategııanyń jańartylǵan nusqasyn ázirleý úshin Qazaqstanda keshendi zertteý jumystary bastaldy. Onyń ishinde jas erekshelikteri jáne aımaqtar boıynsha fýtbolmen shuǵyldanatyndar, ınfraqurylymnyń sapasy, qazaq fýtbolynyń ekonomıkalyq bóligi, demeýshiler men ınvestorlardyń qyzyǵýshylyǵy syndy mańyzdy aspektiler qamtylǵan.
– Zertteý qorytyndysy boıynsha sheshim qabyldanyp, damý jolynyń áleýeti anyqtalady. Qazaqstandyq fýtbolshylardyń damýyna kedergi keltiretin negizgi faktorlar aıqyndalady: oıynshylar men bapkerlerdiń jetispeýi, ınfraqurylymnyń nasharlyǵy jáne t.b. Eldegi fýtboldyń jaǵdaıyn tolyq zertteý buqara halyqtyń qanshalyqty jaqyn ekenin anyqtaýǵa múmkindik beredi. Máselen, 100 myń adamnyń arasynda 10 myńy dop tebedi. Taǵy 40 myńynyń qyzyǵýshylyǵy bar. Olardyń ne sebepten fýtbol oınamaıtynyn anyqtaý qajet. Qazaq fýtboly aldaǵy 3-5 jylda qaı baǵytqa qozǵalatynyn saralap, naqty ári basym baǵyttardy túzý mindet, – deıdi Marıo Leo.
Eýropalyq mamannyń aıtýynsha, jańartylǵan strategııany júzege asyrý 2022 jyldan bastalady. Qazirgi ýaqytta daıyndyq jumystary júrgizilip jatyr.
– Mamyr aıynyń sońynda zertteý jumystaryn aıaqtaımyz. 2019 jyly Nur-Sultan, Almaty, Shymkent, Aqtóbe qalalarynyń fýtbol jaǵdaıyn saralaǵan ÝEFA-nyń Nielsen Sports kompanııasy da zertteý júrgizedi. Olardyń qataryna Qaraǵandy jáne Túrkistan qalalary qosylady.
2019 jáne 2021 jyldar aralyǵyn salystyramyz jáne naqty kórinis alý úshin Nielsen Sports kompanııasynyń zertteý jumystarynyń jańa málimetterin tolyqtyramyz. Qazaq fýtbolynyń qaı baǵytqa jyljyp bara jatqanyn baıqaımyz.
Shilde aıynyń ortasynda málimetterdi taldap, qorytyndy jasaımyz. Ári qaraı basym baǵyttardy, maqsat-mindetterdi aıqyndaımyz. Jańartylǵan strategııa qoldanystaǵy qujatty júzege asyrý nátıjelerin eskerý arqyly daıyndalady. Strategııany bekitip, jobalar men baǵdarlamalardy ázirleýge kirisemiz, – deıdi Eýropalyq bilikti maman.