Sybaılas jemqorlyqqa qarsy qyzmettiń AntikorLive jobasynyń kezekti qonaǵy aqtańger aqyn atanǵan, fılologııa ǵylymdarynyń doktory, professor Amanjol Áltaı boldy, dep habarlaıdy Egemen.kz.
Áńgime sybaılas jemqorlyqqa qarsy mádenıetti qalyptastyrýdaǵy dástúrli qundylyqtardyń mańyzdylyǵyna arnaldy.
Qonaq qazaq qoǵamynyń ejelden beri sybaılas jemqorlyqtan jırengenin sózge tıek etti. Buǵan adamnyń adaldyǵy men ádildigin, parasattylyǵyn ulyqtap, satqyndyq pen aramzalyqty synaıtyn qazaq aqyndary men fılosoftarynyń kóptegen shyǵarmalary dálel bola alady.
«Sybaılas jemqorlyq jaılaǵan elde bereke bolmaıdy. Ult bolyp uıysýdyń joly – jemqorlyqtan alastaý, tek osy keselden aıyqqanda ǵana elimiz saýyqqan, salaýatty jolǵa shyǵady», dep ótti A.Áltaı.
Ol sybaılas jemqorlyqqa qarsy mádenıetti qalyptastyrý týraly aıta kelip, ol bul máselede eki baǵytta – bilim berý deńgeıin arttyrý jáne júıeli tárbıe jumysyn júrgizý baǵytynda aıanbaı eńbek etý qajettigine nazar aýdardy.
Osy turǵyda Amanjol Áltaı «Rýhanı mura» pánin oqytýdy qaıta bastaýdyń mańyzdylyǵyn atap ótti.
Onyń aıtýynsha, buryn L.N. Gýmılev atyndaǵy EUÝ-de oqytylǵan bul kýrs búginde óziniń ómirlik qajettiligi men ózektiligin kórsetip otyr. Sondyqtan ol bul ıdeıany búkil elge taratýdy usyndy.
A.Áltaıdyń pikirinshe, sybaılas jemqorlyqqa qarsy kúresti kúsheıtý máselelerinde jazany qatańdatý kerek, óıtkeni sybaılas jemqorlyq – bul búgingi urpaqqa ǵana emes, bolashaqqa da zııan keltiretin áreket.