Ár jyldary balalardyń tentektigi men qateligi saldarynan 300-den asa órt shyqqan. Ortalyq kommýnıkasııalar qyzmetinde ótken brıfıngte QR TJM Azamattyq qorǵanys jáne áskerı bólimder komıtetiniń tóraǵasy Baýyrjan Syzdyqov osyndaı dedi, dep habarlaıdy Egemen.kz.
Aǵymdaǵy jyldyń 4 aıynda 64 órt tirkelse, 2020 jyly - 330, 2019 jyly 321 órt oqıǵasy tirkelgen.
«Eń aldymen eresekter balalarǵa úıdegi sirińkelerdiń oıynshyq emestigin túsindirýi kerek, balalardy qaraýsyz qaldyrmańyzdar. Sonymen qatar, adamdar kóp jınalatyn jerlerde, oıyn-saýyq ortalyqtarynda, saýda oryndarynda tıisti jumystar atqarylýda. Mamyrdan tamyzǵa deıin «Qaýipsiz balalyq shaq», «Otsyz demalys», «Meniń qaýipsiz demalysym», «Ottan saq bol!» degen sııaqty aksııalar ótkiziledi. Shilde men tamyz aılarynda «Sirińke bir ómirdiń baǵasy» sharasy uıymdastyrylady. Tabıǵı órt, temekiden bolatyn órt boıynsha túrli aksııalar ótedi», dedi B.Syzdyqov.
Onyń aıtýynsha, jyl basynan beri órt saldarynan 17 bala kóz jumǵan, 27 bala terezeden qulaǵan. Bul rette TJM ókili ata-analardy qaýipsizdik sharalaryna basa nazar aýdarýǵa shaqyrdy.