Adamzat balasynyń qol jetkizgen uly ıgilikteriniń biri – bilim qazynasy. Al kitap – adam balasynyń sanǵasyrlyq aqyl-oıynyń jemisi, tarıhy men taǵylymynyń altyn sandyǵy. Osy oraıda Baıqońyr aýdany ákimdiginiń apparaty 1 maýsym – Balalardy qorǵaý kúnine oraı ıgi istiń bastamashysy atanyp, elordada «ashyq aspan astyndaǵy kitaphana» uıymdastyrdy.
Jıynǵa Qazaqstan Jazýshylar odaǵy Nur-Sultan qalalyq fılıalynyń tóraǵasy Dáýletkereı Kápuly, balalar jazýshylary Tolymbek Ábdiraıym men Serikbol Hasan qatysty. Qalamgerler kishkentaı oqyrmandardy ataýly merekemen quttyqtaı kele, kitap oqý mádenıetin qalyptastyrý, zamanaýı qazaq ádebıeti taqyrybynda ózara oı almasyp, kókeıde júrgen pikirlerin ortaǵa saldy. Bul oraıda Dáýletkereı Kápuly Mádenıet jáne sport mınıstrligi jarııalaǵan bıylǵy Balalar ádebıeti jylyndaǵy atqarylar qomaqty istiń alǵysharty ekenin aıta kele, kitap oqýdy nasıhattaý, zııatkerlik áleýetti arttyrý baǵytyndaǵy jumystardyń jalǵasa beretinin jetkizdi.
«Qalamgerler alleıasy 2019 jyly qyrkúıekte «Tuńǵysh Azııa aqyn-jazýshylarynyń forýmy» qarsańynda Oljas Súleımenov, Ulyqbek Esdáýlet, Esenǵalı Raýshanov, Marhabat Baıǵut syndy qazaqtyń kórnekti aqyn-jazýshylarynyń qatysýymen ashylǵan edi. Nur-Sultan qalasy ákimdiginiń uıytqy bolýymen bıyl aqyn-jazýshylar 50-deı kóshet otyrǵyzdy, bul ıgilikti shara keleshekte de jalǵasa beredi. Al merekege oraı qalamgerler kitaphanasyn ashý josparlanyp otyr, búgingi jıyn sol qadamnyń alǵysharty deýge bolady. Merekede balalardyń kitapqa degen qyzyǵýshylyǵyn arttyrý maqsatynda №5 qalalyq balalar kitaphanasy men «Folıant» baspasy balalarǵa arnalǵan kitap jármeńkesin ótkizdi. Kitaphana ár juma saıyn ashyq aspan astynda jumys isteı beredi. Sondaı-aq qalamgerlermen kezdesý ótkizip, oqyrmandardy tartý oıymyzda bar. Negizinen qalamgerlermen betpe-bet kezdesýge jas oqyrmandardy tarta otyryp, kitap oqý mádenıetin jaqsartsaq degen oı. Qazaq tiliniń mártebesin kóterý úshin balalardy kitap oqýǵa baýlý ata-ananyń da, kez kelgen qalamgerdiń de qaıratkerlik tanytatyn tusy. Sondyqtan qazaq tiliniń mártebesin kóterý, qazaq balasynyń mádenıetin arttyrý birinshi kezekte turǵan másele dep esepteımin», degen Dáýletkereı Kápuly qalamgerlerdiń qoldan kelgenshe atsalysatynyn jetkizdi.
Jıynǵa Nur-Sultan qalasy máslıhatynyń depýtattary Nurlan Kópeshov, Saltanat Muqanbetpanqyzy, Lázzat Murat- qyzy qatysyp, balaqaılardy merekelerimen quttyqtap, óz taraptarynan tartý-taralǵy jasady. «Folıant» baspa úıi balalar shyǵarmashylyǵyna qatysty baspa týyndylarynan arnaıy kórme uıymdastyryp, kitaptar jármeńkesin ótkizdi. Sonymen qatar Nur-Sultan qalalyq Ortalyqtandyrylǵan kitaphanasy qoryndaǵy kitaptar kórmesin kishkentaı oqyrmandar nazaryna usyndy.
Atalǵan is-shara balaqaılarǵa merekelik kóńil kúı syılaý úshin Baıqońyr aýdany ákimi apparaty uıymdastyrǵan kóńildi sergitý ýaqytymen jalǵasty. Sondaı-aq balalarǵa táttiler taratylyp, belsendi oqýshylarǵa ákimdik tarapynan arnaıy syılyqtar da tabys etildi. Igi sharanyń ári qaraı jalǵasatynyna qýanyshty ekendikterin jetkizgen qala turǵyndary men merekelik jıynǵa qatysqan balalar da, ata-analar da dán rıza.
Taǵy bir aıta keterligi, Baıqońyr aýdany ákimi apparatynyń bastamasymen uıymdastyrylǵan is-shara aldaǵy jaz maýsymynda ár demalys kúnderi jalǵasyn tappaq. Ondaǵy maqsat – jazǵy demalys kezinde oqýshylardy, stýdentterdi jáne aýdan turǵyndaryn oqýǵa tartý, ýaqyttaryn tıimdi ótkizý, saıabaqta júrgen demalýshylarǵa aqparat usyný, sonymen qatar kitaphanaǵa turaqty oqyrman retinde jazylýǵa múmkindik jasaý. Qalamgerler alleıasynda aspan astyndaǵy kitaphanada kóbine balalarǵa arnalǵan ádebıetter, áıgili jazýshylardyń poemalary, shyǵarmalary qoıylmaq.